Gujarati News

નવી દિલ્હી, તા. ૩ :. આજે ભારતીય વાયુદળમાં અપાચે હેલીકોપ્ટર સામેલ થઈ રહ્યુ છે. આ સાથે વાયુદળની તાકાતમાં વધારો થયો છે અને હવે દુશ્મનોની ખેર નથી. આજે પઠાનકોટ એરબેઝ પર આ હેલીકોપ્ટર સામેલ થયુ છે. ભારતને કુલ ૨૨ અપાચે હેલીકોપ્ટર મળવાના છે. હાલ ૮ આ હેલીકોપ્ટર સામેલ થશે.

ભારતીય વાયુદળ હવે વધુ તાકાતવર બન્યુ છે. આજે વાયુદળના વડા એર ચીફ માર્શલ ધનોવા પઠાણકોટ એરબેઝ પર ૮ અપાચે હેલીકોપ્ટરને સામેલ કરી રહ્યા છે. આ એ જ પઠાણકોટ એરબેઝ છે જ્યાં ૨૦૧૬માં પાકિસ્તાનથી આવેલા ત્રાસવાદીઓએ હુમલો કર્યો હતો.

અત્રે નોંધનીય છે કે ૬૦ ફુટ ઉંચા અને ૫૦ ફુટ પહોળા અપાચે હેલીકોપ્ટરને ઉડાડવા માટે બે હેલીકોપ્ટર જરૂરી છે. આ હેલીકોપ્ટરની પાંખને ચલાવવા માટે બે એન્જીન હોય છે અને તેથી તેની ઝડપ પણ વધુ રહેશે.

બે શીટર આ હેલીકોપ્ટરમાં હેલીફાયર અને સ્ટ્રીંગર મિસાઈલો લાગેલી છે. તેમા એક સેન્સર પણ છે જેને કારણે આ હેલીકોપ્ટર રાતમાં પણ ઓપરેશન કરી શકે છે.

આ હેલીકોપ્ટરની વધુમાં વધુ સ્પીડ ૨૮૦ કિ.મી.ની ઝડપ છે. અપાચે હેલીકોપ્ટરની ડીઝાઈન એવી છે કે તેને રડાર પર ઉતારવુ મુશ્કેલ છે.

અમેરિકામાં બનેલ આ અપાચે હેલીકોપ્ટર વિશ્વની સૌથી મોટા એડવાન્સ મલ્ટી કોમ્બેકટ હેલીકોપ્ટર છે. ભારત અને અમેરિકા વચ્ચે સપ્ટેમ્બર ૨૦૧૫માં એક મોટી ડીલ થઈ હતી જે હેઠળ ભારતને આવા ૨૨ હેલીકોપ્ટર મળવાના છે.