Gujarati News

Gujarati News

News of Tuesday, 3rd August 2021

મોટા ભાઈએ ઠપકો આપતા નાના ભાઈઓએ હત્યા કરી

ચાર દિવસ પહેલાંની હત્યાનો ભેદ ઉકેલાયો : લોખંડના સળિયાથી હત્યા કર્યા બાદ લાશને પોલિથિન બેગમાં ભરીને બાઈક પર લઈ જઈ સગે વગે કરી દીધી

 

દેવરિયા, તા. : યુપીના દેવરિયામાં પોલીસે ચાર દિવસ પહેલા વીજ વિભાગના કોન્ટ્રાક્ટ કર્મચારીની હત્યાનો ભેદ ઉકેલી દીધો છે. હત્યાકેસમાં સોમવારે પોલીસે મૃતકના બે નાના ભાઈઓની ધરપકડ કરી હતી. એસપી ડો.શ્રીપતિ મિશ્રાના જણાવ્યા અનુસાર મોટા ભાઈના ઠપકાથી ગુસ્સે થઈને નાના ભાઈઓએ લોખંડના સળિયા વડે હત્યા કર્યા બાદલાશને પોલીથીન બેગમાં ભરીને બાઇક પર લઈ જઈને સગેવગે કરી દીધી હતી.

મૃતદેહ લઈ જવાની ઘટના નજીકમાં લાગેલા સીસીટીવી કેમેરામાં કેદ થઈ હતી. તેની મદદથી પોલીસે હત્યાનો પર્દાફાશ કર્યો છે. બરિયારપુર પોલીસ સ્ટેશન વિસ્તારના સરૈયા ગામમાં રહેતા અરવિંદ યાદવ કુશીનગરના હાટા પાવર સબસ્ટેશનમાં કોન્ટ્રાક્ટ પર કામ કરતા હતા. અરવિંદના પિતા રાધેશ્યામ યાદવ સેનામાં કલાર્ક છે.

શહેરના સાકેત નગર વિસ્તારમાં પણ તેમનું ઘર છે. ચાર ભાઈઓ અને એક બહેન અરવિંદથી નાના છે. ૨૮ જુલાઈના રોજ તેનો મૃતદેહ મુંડેરા ચાર રસ્તા નજીક ઝાડીઓમાં એક કોથળામાં મળી આવ્યો હતો. જો કે, અરવિંદનું બાઇક, પર્સ અને મોબાઇલ ફોન ગાયબ હતા. ઘટનાનો ખુલાસો પોલીસ માટે પડકાર બની રહ્યો હતો.

તપાસ દરમિયાન સાકેત નગર ચાર રસ્તા પર આવેલી દુકાનના સીસીટીવી કેમેરામાંથી મળેલી કડીના આધારે પોલીસે મૃતકના બંને નાના ભાઈઓની પૂછપરછ કરી હતી, જેમાં સમગ્ર હકીકત સામે આવી હતી. પોલીસના જણાવ્યા અનુસાર આરોપીએ કહ્યું કે મોટો ભાઈ અરવિંદ ઘણીવાર નાની-નાની વાતોમાં પણ તેને ઠપકો આપતો અને ક્યારેક-ક્યારેક તેને મારતો પણ હતો.

ભાઈઓના કહેવા મુજબ તે ઘણીવાર તેની માતા સાથે પણ ઝઘડો કરતો હતો. ઘટનાના એક દિવસ પહેલા ૨૭ જુલાઈના રોજ ઘરમાં લગાવેલા હેન્ડપંપને નુકસાન થયું હતું. ડ્યૂટી પર જતાં પહેલા અરવિંદે તેના ભાઈને હેન્ડપંપ ઠીક કરવા કહ્યું હતું, જ્યારે તે સાંજે ઘરે પરત ફર્યો ત્યારે હેન્ડપંપ રિપેર નહોતું.

અરવિંદે માટે તેના ભાઈઓને ઠપકો આપ્યો અને પોતે રિપેર કરવાનું શરૃ કર્યું હતું. મોટા ભાઈએ આપેલા ઠપકાથી ગુસ્સે થયેલા નાના ભાઈઓએ તેના માથા પર લોખંડના સળિયા વડે હુમલો કર્યો હતો. જેના કારણે અરવિંદનું ઘટનાસ્થળે મોત થયું હતું. હત્યાના આરોપી ભાઈઓમાં એક ઈન્ટર વિદ્યાર્થી છે અને બીજો સગીર છે.

હત્યા બાદ બંને ભાઈઓએ લાશને થોડા દિવસો પહેલા ખરીદેલી પોલિથિનમાં લપેટી તેને કોથળામાં ભરીને બાઇક પર લઈ જઈ અહલ્યાપુર ગામ નજીક ઝાડીમાં ફેંકી દીધી હતી. બીજા દિવસે લાશ મળતા આરોપી ભાઈ ત્યાં પહોંચીને રડવા લાગ્યા હતા. પોલીસના જણાવ્યા અનુસાર મૃતકના ભાઈઓએ એક મહિના પહેલા હત્યાની યોજના બનાવી હતી.

(7:34 pm IST)