Gujarati News

મુંબઈ, તા. ૩ :. વાવાઝોડુ નિસર્ગ ૧૨૦ કિમી પ્રતિ કલાકની ઝડપે આજે બપોરે અલીબાગના કિનારે ત્રાટકયુ છે. જેને કારણે દરીયામાં ઉંચા ઉંચા મોજા ઉછળી રહ્યા છે. ભયંકર ઝડપે પવન ફુંકાતા અનેક સ્થળે વૃક્ષો જમીનદોસ્ત થયા છે તો અનેક છત્તો હલી ગઈ છે. વિજળી અને ટેલીફોનના થાંભલાઓનો સોથ વળી ગયો છે. વાવાઝોડાની અસર સ્વરૂપ કિનારાના વિસ્તારોમાં ભારે વરસાદ પડી રહ્યો છે. જો કે મુંબઈવાસીઓ માટે ખતરો ઓછો થઈ ગયો છે.

મળતા અહેવાલો મુજબ વાવાઝોડુ નિસર્ગ મહારાષ્ટ્રના કિનારે ટકરાયુ છે. રત્નાગીરી, સિંધુદુર્ગ, અલીબાગ સહિતના વિસ્તારોમાં ભારે વરસાદ અને પવન ફુંકાય રહ્યો છે. હવામાન ખાતાના જણાવ્યા પ્રમાણે ચક્રવાતી વાવાઝોડુ ૧૨૦ કિમીની ઝડપે ફુંકાયુ છે. મુંબઈના મોટા ભાગના વિસ્તારોમાં પણ ભારે પવન સાથે વરસાદ પડી રહ્યો છે. બપોર બાદ મુંબઈમાં વાવાઝોડુ ટકરાઈ શકે છે. જો કે તબાહી ઓછી થવાની સંભાવના છે.

વાવાઝોડુ નિસર્ગ આજે સવારે ૧૧.૩૦ કલાકે રાયગઢમાં લેન્ડપોલ થયુ છે જેને કારણે ભારે વરસાદ અને પવન ફુંકાય રહ્યો છે. મહારાષ્ટ્રના દરીયા કિનારાના વિસ્તારોમાં વૃક્ષો ધરાશયી થયા છે અને થાંભલાઓ જમીન દોસ્ત થયા છે.

વાવાઝોડુ નિસર્ગે રાયગઢ જિલ્લામાં કહેર વર્તાવ્યો છે. જિલ્લામાં ભારે નુકશાની થયાનુ જણાય છે. અનેક લોકોને સલામત સ્થળે ખસેડવામાં આવ્યા છે. દરીયામાં ઉંચા ઉંચા મોજા ઉછળી રહ્યા છે.

એનડીઆરએફની ટીમો રાહત અને બચાવ કાર્યમાં લાગી ગઈ છે. વિજળી વ્યવહાર ઠપ્પ થઈ ગયો છે. વાવાઝોડાની પ્રક્રિયા ૩ કલાક ચાલવાની છે.

દરમિયાન મુંબઈમાં વાવાઝોડાની અસર સ્વરૂપ લગભગ તમામ વિસ્તારોમાં વરસાદ પડી રહ્યો છે. વાવાઝોડાના કારણે બાંદ્રા-વર્લી સિલીંક પર ટ્રાફીક અટકાવી દેવાયો છે. મુંબઈ ઉપરાંત થાણે, રત્નાગીરીમાં પણ વરસાદ પડી રહ્યો છે. મહારાષ્ટ્રમાં કિનારે દરીયો ગાંડોતૂર થતા કિનારે લાંગરેલા વહાણો હલી રહ્યા છે. હાઈટાઈડની પણ ચેતવણી આપવામાં આવી છે. મુંબઈમાં ૮૦ હજાર લોકોને સલામત સ્થળે ખસેડાયા છે. શહેરમાં ૧૪૪મી કલમ લાગુ છે. લોકોને ઘરની બહાર નહિ નિકળવા જણાવાયુ છે. નૌકાદળની ટીમો પણ એલર્ટ કરી દેવામાં આવી છે.