Gujarati News

મેરઠ, તા.૩ : હાઈસ્કૂલમાં ભણતી ૧૪ વર્ષની છોકરી પર કથિત ગેંગરેપ કર્યા બાદ તેને ઝેર આપી દેવાયાની એક ચોંકાવનારી ઘટના સામે આવી છે. આ હિચકારા કૃત્યને અંજામ આપનારા ચાર નરાધમોમાંથી એક છોકરી સાથે ટ્યૂશનમાં ભણતો હતો, અને બાકીના ત્રણ તેના મિત્રો હતા. ગુરુવારે સાંજે બનેલી આ ઘટનામાં છોકરી ઘરના દરવાજા પાસે પહોંચતા જ ઢળી પડી હતી, તેણે દુષ્કર્મીઓના નામ આપ્યા હતા અને થોડા સમયમાં જ દમ તોડી દીધો હતો.

યુપીના મેરઠમાં બનેલી આ ઘટનામાં પોલીસનું માનવું છે કે, ગેંગરેપ બાદ આઘાતમાં સરી પડેલી છોકરીએ જાતે જ ઝેર પી લીધું હોઈ શકે છે. છોકરીના એક પરિવારજનના જણાવ્યા અનુસાર, તે ટ્યૂશન જવાનું કહી બપોરે ૩.૩૦ કલાકે ઘરેથી નીકળી હતી. અંદાજે સવા પાંચ વાગ્યાની આસપાસ તે ઘરે આવી હતી, અને દરવાજા પાસે જ ઢળી પડી હતી.

છોકરીના મામાએ તેના પર ગેંગરેપ ગુજારાયા બાદ દુષ્કર્મીઓએ તેને ઝેર આપી દીધું હોવાનો દાવો કરતાં જણાવ્યું હતું કે છોકરી ભાનમાં હતી ત્યારે તેણે તેની મમ્મીને લખન નામના એક છોકરાનું નામ આપ્યું હતું. તેણે એમ પણ કહ્યું હતું કે લખન અને તેના ત્રણ મિત્રોએ તેના પર ગેંગરેપ કર્યો છે. તે બાકીના ત્રણ લોકોને ઓળખતી નથી, પરંતુ જો તેમને તેની સામે લાવવામાં આવે તો ઓળખી જશે. આટલું કહીને છોકરી બેભાન થઈ ગઈ હતી.

છોકરીને તેના પરિવારજનો હોસ્પિટલમાં લઈને ગયા હતા, પરંતુ ત્યાં તેને મૃત જાહેર કરવામાં આવી હતી. છોકરીના કાકાએ આ મામલે લખન નામના ૧૮ વર્ષીય યુવક અને ત્રણ અજાણ્યા શખસો વિરુદ્ધ ફરિયાદ નોંધાવી છે. પોલીસે આરોપીઓ સામે પોક્સો, ગેંગરેપ તેમજ મર્ડરના ગુના દાખલ કર્યા છે. મેરઠ ગ્રામ્યના એસપી કેશવ કુમારના જણાવ્યા અનુસાર, છોકરીના ઘરમાંથી ચાર લાઈનની એક સ્યૂઈસાઈડ નોટ મળી છે. જેમાં જણાવાયું છે કે, ટ્યૂશનમાં સાથે ભણતા એક છોકરાએ પોતાના ત્રણ મિત્રો સાથે તેના પર ગેંગરેપ કર્યો હતો, અને તેને આપઘાત કરવાની ફરજ પાડી હતી. પ્રાથમિક દ્રષ્ટિએ સ્યૂઈસાઈડ નોટના અક્ષર છોકરીના અક્ષર સાથે મેચ થાય છે.

બીજી તરફ, છોકરીના પરિવારજનોનો દાવો છે કે ઘરમાંથી કોઈ સ્યૂઈસાઈડ નોટ નથી મળી. આ ઘટના બની ત્યારે ઘરમાં ૧૦૦-૨૦૦ લોકો ભેગા થઈ ગયા હતા અને કોઈએ સ્યૂઈસાઈડ નોટ વિશે કશીય વાત નહોતી કરી.

છોકરીના મામાએ દાવો કર્યો હતો કે આ કેસ ગેંગરેપ અને મર્ડરનો છે. પોલીસે આ મામલે લખન તેમજ તેના એક દોસ્તની ધરપકડ કરી લીધી છે. તેમની પૂછપરછ દરમિયાન જે પણ વિગતો પ્રાપ્ત થશે તેના આધારે આગળ કાર્યવાહી કરાશે તેમ પોલીસે જણાવ્યું હતું.