Gujarati News

Gujarati News

News of Monday, 2nd August 2021

કોરોનાની ઉત્પત્તી ચીનમાં થઈ હોવાનો ટ્રમ્પના પક્ષનો દાવો

કોરોનાની ઉત્પત્તીને લઈને ચીન ફરી ચર્ચામાં : અમેરિકાની રિપબ્લિકન પાર્ટીના રિપોર્ટમાં વાયરસની ઉત્પત્તિ ચીનની વુહાન લેબમાં થઈ હોવાનો દાવો કરાયો

 

વોશિંગ્ટન, તા.૨ : કોરોના મહામારીની ઉત્પત્તિને લઈને ફરી એકવખત ચીન ચર્ચામાં છે. આ વખતે અમેરિકાની રિપબ્લિકન પાર્ટીના એક રિપોર્ટમાં દાવો કરાયો છે કે, આ વાયરસની ઉત્પત્તિ ચીનમાં થઈ હતી. ઉલ્લેખનીય છે કે, આ પહેલા અમેરિકના પૂર્વ પ્રેસિડન્ટ ડોનાલ્ડ ટ્રમ્પે કોરોનાની ઉત્પત્તિને લઈને ચીન સામે આંગળી ચિંધી હતી. તે પછી અમેરિકાના નવા પ્રેસિડન્ટ જો બાઈડને પણ એવું જ સ્ટેન્ડ લીધું હતું. હવે, ટ્રમ્પની પાર્ટીના રિપોર્ટમાં ચીનની લેબમાંથી કોરોના વાયરસ લીક થયાની વાત કહેવાઈ છે. વર્લ્ડ હેલ્થ ઓર્ગેનાઈઝેશનની ટીમ પણ કોરોનાની ઉત્પત્તિને લઈને ચીનના વુહાનમાં તપાસ કરી ચૂકી છે.

અમેરિકાની રિપબ્લિકન પાર્ટી દ્વારા સોમવારે જાહેર કરાયેલા એક રિપોર્ટમાં દાવો કરાયો છે કે, કોરોના મહામારીને જન્મ આપનારા કોરોના વાયરસની ઉત્પત્તિ ચીનની વુહાન લેબમાં થઈ છે. આ મુદ્દાને લઈને છેલ્લા એક વર્ષથી વાદ-વિવાદ ચાલી રહ્યો છે. ખાસ વાત એ છે કે, આ રિપોર્ટમાં એ વાતને ફગાવી દેવાઈ છે કે, આ વાયરસ મીટ બજારમાંથી ફેલાયો છે. તેમાં કહેવાયું છે કે, તેના પૂરતા પુરાવા છે કે, તે સપ્ટેમ્બર પહેલા વુહાન ઈન્સ્ટીટ્યૂટ ઓફ વાયરોલોજીમાંથી લીક થયો હતો અને દુનિયાએ તો ઘણા મહિના પછી આ બીમારી પર ધ્યાન આપવાનું શરૂ કર્યું હતું.

રિપોર્ટમાં કહેવાયું હતું કે, હવે અમે માનીએ છી કે વુહાન મીટ બજારને સ્ત્રોતના રૂપમાં સંપૂર્ણ રીતે નકારી દેવાનો સમય આવી ગયો છે. અમે એ પણ માનીએ છીએ કે, પુરાવા એ વાત તરફ ઈશારા કરી રહ્યા છે કે, વાયરસ લીક થયો અને એવું ૧૨ સપ્ટેમ્બર, ૨૦૧૯થી થોડા સમય પહેલા થયું. હાઉસ ફોરેન અફેયર્સ કમિટીના ટોચના રિપબ્લિકન અને ટેક્સાસના ૧૦મા કોંગ્રેસ જિલ્લાના પ્રતિનિધિ માઈક મેકકોલે પેનલના રિપબ્લિકન કર્મચારીઓ દ્વારા તૈયાર કરાયેલો રિપોર્ટ જાહેર કર્યો. સાથે જ તેમણે કોરોના વાયરસની ઉત્પત્તિની તપાસનું આહવાહન પણ કર્યું.

રિપોર્ટમાં એ વાતનો ઉલ્લેખ છે કે, વુહાન લેબમાં સુરક્ષા પ્રોટોકોલની યોગ્ય વ્યવસ્થા નથી. જુલાઈ, ૨૦૧૯માં વેસ્ટ ટ્રીટમેન્ટ સિસ્ટમ માટે ૧.૫ મિલિયન ડોલરની માગ કરાઈ. તેમાં કહેવાયું છે કે, વુહાન લેબમાં ચીનના વૈજ્ઞાનિકો મનુષ્યોને સંક્રમિત કરવા માટે કોરોના વાયરસને બદલવા માટે કામ કરી રહ્યા હતા.આ પ્રકારની હેરફેરને છૂપાવી શકાતી હતી. વુહાન લેબને અમેરિકા અને ચીન બંનેની સરકારો તરફથી ભારે ફંડ મળી રહ્યું હતું. અમેરિકાના ટોચના ચેપી રોગ વિશેષજ્ઞ ડો. એન્થની ફોસીએ પણ વુહાન લેબને હજારો ડોલરનું ફંડિગ આપવામાં આવતું હોવાની વાત સ્વીકારી છે.

અમેરિકાના પ્રેસિડન્ટ જો બાઈડને પણ ગુપ્તચર એજન્સીઓને વાયરસની ઉત્પત્તિ વિશે તપાસ કરવાની જવાબદારી સોંપી છે. મેકકોલનો રિપોર્ટ આ પ્રયાસની તદ્દન સમાંતર છે. વર્લ્ડ હેલ્થ ઓર્ગેનાઈઝેશનના વૈજ્ઞાનિકોએ પણ વાયરસની ઉત્પત્તિને લઈને તપાસ કરી અને તેના માટે તેમણે વુહાન શહેરની મુલાકાત પણ લીધી હતી. સંગઠન મુજબ, વાયરસ પ્રાકૃતિક રીતે ઉત્પન્ન થયો અને પ્રાણીઓ દ્વારા મનુષ્યો સુધી પહોંચ્યો હતો. જોકે, અમેરિકાએ આ રિપોર્ટને લઈને શંકા વ્યક્ત કરી હતી.

(8:55 pm IST)