Gujarati News

Gujarati News

News of Wednesday, 2nd May 2018

ફોર્ટિસ હેલ્થકેરને ખરીદવાની સ્‍પર્ધાઅે બીડ સુપરત કરવાના આખરી દિવસે વેગ પકડ્યો

નવી દિલ્‍હીઃ નવી દિલ્હી:ફોર્ટિસ હેલ્થકેરને ખરીદવાની સ્પર્ધાએ બિડ સુપરત કરવાના આખરી દિવસે વેગ પકડ્યો હતો. મલેશિયન હેલ્થકેર ગ્રૂપ IHH અને હીરો-બર્મન ફેમિલીએ ઓફરમાં વધારો કર્યો છે. અન્ય બિડર મણિપાલ-TPGને ઓફરમાં ફેરફાર કરવા 6 મે સુધીનો સમય મળશે. ઉલ્લેખનીય છે કે, 27 માર્ચે ફોર્ટિસ બોર્ડ સાથે બંધનકર્તા કરારમાં પ્રવેશેલા મણિપાલ-TPGને કરારના ભાગરૂપે બિડ માટે વધારાનો સમય મળ્યો છે.

ફોર્ટિસે મંગળવારે સ્ટોક એક્સ્ચેન્જિસને જણાવ્યું હતું કે, IHHની સુધારેલી ઓફરમાં શેર દીઠ ₹175ના ભાવે તાત્કાલિક ઇક્વિટી રોકાણ અને ત્યાર પછી આટલા જ કે તેનાથી ઓછા ભાવે વધુ ઇક્વિટી ભંડોળ ઠાલવવાનો સમાવેશ થાય છે. અન્ય તમામ શરતો IHHની અગાઉની 24 એપ્રિલની ઓફર મુજબ રહેશે.

નવી ઓફરની ગણતરી પ્રમાણે IHHએ ફોર્ટિસ માટે રૂપિયા .7,500 કરોડના મૂડીરોકાણનો પ્રસ્તાવ મૂક્યો છે. જેમાં કંપનીમાં રૂપિયા 4,000 કરોડ અને લઘુમતી શેરધારકોનો 26 ટકા હિસ્સો ખરીદવા માટે લગભગ રૂપિયા 3,500 કરોડની ખરીદીનો સમાવેશ થાય છે. ઉલ્લેખનીય છે કે, મણિપાલ-TPG અને રેડિયન્ટ-KKRની જેમ IHHએ ફોર્ટિસના હોસ્પિટલ્સ બિઝનેસને ડિમર્જ કરવાની માંગણી કરી નથી.

IHHએ 24 એપ્રિલે બંધનકર્તા ઓફર કરી હતી. જેમાં કોઈ ડ્યૂ ડિલિજન્સ વગર ફોર્ટિસમાં પ્રેફરન્શિયલ ઇશ્યૂ દ્વારા રૂપિયા 650 કરોડના રોકાણ અને શેર દીઠ રૂપિયા 160ના ભાવે ઇક્વિટી શેરની ફાળવણીનો પ્રસ્તાવ હતો. ઉપરાંત, ત્રણ સપ્તાહની ડ્યૂ ડિલિજન્સ પ્રક્રિયા પછી IHHએ મહત્તમ રૂપિયા 160ના શેર ભાવે રૂપિયા 3,350 કરોડના રોકાણની ઓફર કરી હતી. IHHએ મંગળવારે ફોર્ટિસને એક પત્રમાં જણાવ્યું હતું કે, અમે ભારપૂર્વક જણાવીએ છીએ કે, લાંબા ગાળાના વ્યૂહાત્મક રોકાણકાર તરીકે IHH કંપનીની ભાવિ વૃદ્ધિને વેગ આપવા, જરૂરી ટેકો અને ભંડોળ પૂરું પાડવા સારી સ્થિતિમાં છે.

અન્ય બિડર સુનિલ કાંત મુંજાલની હીરો એન્ટરપ્રાઇઝિસ અને ડાબર ગ્રૂપના બર્મન ફેમિલીએ પણ હવે ફોર્ટિસમાં રૂપિયા 1,800 કરોડના સીધા રોકાણનો નિર્ણય લીધો છે. અગાઉ તેમણે રૂપિયા 1,500 કરોડના રોકાણની જાહેરાત કરી હતી. હીરો-બર્મન ફેમિલીએ હવે ફોર્ટિસ બોર્ડમાં ત્રણ સીટની માંગણી કરી છે. ફોર્ટિસને મંગળવારે લખેલા પત્રમાં જણાવ્યા અનુસાર સંયુક્ત બિડર્સે શેર દીઠ રૂપિયા 167ના ભાવે ઇક્વિટી શેરના પ્રેફરન્શિયલ ઇશ્યૂ દ્વારા અથવા સેબીની ICDR માર્ગરેખા બંનેમાંથી જે વધુ હોય તેના આધારે રૂપિયા 800 કરોડના રોકાણની ઓફર કરી છે.

તેમણે પ્રેફરન્શિયલ વોરંટ્સ અથવા સેબીની ICDR માર્ગરેખા અનુસાર વધારાના રૂપિયા 1,000 કરોડનો પણ પ્રસ્તાવ મૂક્યો છે. તેમણે જણાવ્યું હતું કે, વોરંટની રકમ સહિત ફોર્ટિસમાં તેમનું અપફ્રન્ટ રોકાણ રૂપિયા 1,050 કરોડ થશે. હીરો-બર્મન ફેમિલીએ ફોર્ટિસને હોસ્પિટલ બિઝનેસ પર ધ્યાન કેન્દ્રિત કરવા ડાયગ્નોસ્ટિક્સ બિઝનેસ SRLનો હિસ્સો વેચવાની ભલામણ કરી છે.

(6:04 pm IST)