Gujarati News

Gujarati News

News of Sunday, 1st October 2023

આદિત્‍ય- L-1 મિશન/ચંદ્રયાન-3 બાદ હવે સૂર્ય મિશનને લઈને પણ ભારતમાં ગુડ ન્યૂઝ, ISROને આદિત્ય L-1 માં મળી મોટી સફળતા

અવકાશયાન સફળતાપૂર્વક પૃથ્વીના પ્રભાવના ક્ષેત્રમાંથી બહાર નીકળી ગયું, લેગ્રેન્જ પોઈન્ટ પર પહોંચ્યા પછી VELC પેલોડ દરરોજ 1,440 ઈમેજીસ ટ્રાન્સમિટ કરશેઃ અત્યાર સુધી આદિત્ય-L1 પૃથ્વીથી 9.2 લાખ કિલોમીટરથી વધુનું અંતર કાપ્યું

નવી દિલ્‍હીઃ  ચંદ્રયાન-3 મિશનમાં મળેલી સફળતા બાદ ISROએ શનિવારે ભારતના પ્રથમ સૂર્ય મિશન આદિત્ય-L1 વિશે સારા સમાચાર આપ્યા છે. સ્પેસ એજન્સીએ કહ્યું છે કે, હવે તેનું અવકાશયાન સફળતાપૂર્વક પૃથ્વીના પ્રભાવના ક્ષેત્રમાંથી બહાર નીકળી ગયું છે. અત્યાર સુધી આદિત્ય-L1 પૃથ્વીથી 9.2 લાખ કિલોમીટરથી વધુનું અંતર કાપ્યું છે.


રાષ્ટ્રીય અવકાશ એજન્સીએ 'X' પર એક નિવેદનમાં જણાવ્યું હતું કે, આદિત્ય-L1 એ પૃથ્વીથી 9.2 લાખ કિલોમીટરથી વધુનું અંતર કાપ્યું છે. તે હવે સન-અર્થ લેગ્રેન્જ પોઈન્ટ-1(L1) તરફ આગળ વધી રહ્યું છે. આ બીજી વખત છે જ્યારે ISRO પૃથ્વીના પ્રભાવના ક્ષેત્રની બહાર અવકાશયાન મોકલી શક્યું છે. પ્રથમ વખત માર્સ ઓર્બિટર મિશનમાં મોકલવામાં આવ્યું છે.

મહત્વનું છે કે, ISROએ આ મહિનાની શરૂઆતમાં જણાવ્યું હતું કે, આદિત્ય-L1 સૌર મિશન અવકાશયાન એ ડેટા એકત્રિત કરવાનું શરૂ કર્યું છે જે વૈજ્ઞાનિકોને પૃથ્વીની આસપાસના કણોના વર્તનનું વિશ્લેષણ કરવામાં મદદ કરશે. તેમાં કહેવામાં આવ્યું છે કે, L1ની આસપાસ એકત્રિત કરવામાં આવેલ ડેટા એનિસોટ્રોપી, સૌર પવનની ઉત્પત્તિ અને અવકાશના હવામાનની ઘટનાની સમજ આપશે. નોંધનીય છે કે, 2 સપ્ટેમ્બરના રોજ ISRO દ્વારા PSLV-C57 રોકેટ દ્વારા આદિત્ય-L1નું પ્રક્ષેપણ સફળતાપૂર્વક પૂર્ણ થયું હતું. 

આદિત્ય-L1 અવકાશયાન સૂર્યનો અભ્યાસ કરવા માટે કુલ સાત જુદા જુદા પેલોડ વહન કરે છે. તેમાંથી ચાર સૂર્યમાંથી પ્રકાશનું અવલોકન કરશે અને બાકીના ત્રણ પ્લાઝ્મા અને ચુંબકીય ક્ષેત્રના ઇન-સીટુ પરિમાણોને માપશે. તમને જણાવી દઈએ કે, આદિત્ય L1માં બે મુખ્ય પેલોડ છે, વિઝિબલ એમિશન લાઇન કોરોનોગ્રાફી (VELC) અને સોલર અલ્ટ્રાવાયોલેટ ઇમેજિંગ ટેલિસ્કોપ (SUIT).

1,440 ઈમેજીસ ટ્રાન્સમિટ કરશે VELC પેલોડ
મહત્વનું છે છે કે, લેગ્રેન્જ પોઈન્ટ પર પહોંચ્યા પછી VELC પેલોડ દરરોજ 1,440 ઈમેજીસ ટ્રાન્સમિટ કરશે. તેથી આ પેલોડને આદિત્ય-L1 નું ખૂબ જ મહત્વપૂર્ણ પેલોડ માનવામાં આવી રહ્યું છે. આદિત્ય-L1 ને લેગ્રેન્જ પોઈન્ટ 1 (L1) ની આસપાસ પ્રભામંડળની ભ્રમણકક્ષામાં મૂકવામાં આવશે. તે સૂર્યની આસપાસ સમાન સંબંધિત સ્થિતિમાં પરિભ્રમણ કરશે અને તેથી સતત સૂર્યનું અવલોકન કરી શકે છે.

(1:09 pm IST)