Gujarati News

Gujarati News

News of Sunday, 1st October 2023

પાકિસ્તાનમાં હાફિઝ સઈદના પુત્ર કમાલુદ્દીન સઈદની હત્યા

-આતંકી હાફિઝ સઈદનો પુત્ર કમાલુદ્દીન સઈદ ર૬ સપ્ટેમ્બરથી ગુમ હતોઃ પાકિસ્તાનની ગુપ્તચર સંસ્થા આઈએસઆઈ પણ તેને શોધી શકી નથી

નવી દિલ્‍હીઃ પાકિસ્તાનમાં હાફિઝ સઈદના પુત્ર કમાલુદ્દીન સઈદની હત્યાના સમાચાર સામે આવ્યા છે. નોંધનીય છે કે, આતંકી હાફિઝ સઈદનો પુત્ર 26 સપ્ટેમ્બરથી ગુમ હતો. રિપોર્ટ અનુસાર કમલુદ્દીન સઈદનું પેશાવરમાં કારમાં આવેલા બદમાશોએ અપહરણ કર્યું હતું. તેને શોધવાના પ્રયાસો થઈ રહ્યા છે, પરંતુ પાકિસ્તાનની ગુપ્તચર સંસ્થા આઈએસઆઈ પણ તેને શોધી શકી નથી.


આ તરફ હાફિઝના પુત્રને કોણ લઈ ગયું અને ક્યાં લઈ ગયું તેના કોઈ સમાચાર નથી. જેના કારણે ભારતને આતંકવાદના અસંખ્ય ઘા આપનાર આતંકી હાફિઝ સઈદ ત્યારથી આંસુ વહાવી રહ્યો છે. તે હંમેશા ભારત વિરુદ્ધ ઝેર ઓકતો હતો. હાફિઝ સઈદ મુંબઈમાં 26/11ના આતંકવાદી હુમલાનો માસ્ટરમાઈન્ડ છે. તે ઈસ્લામિક આતંકવાદી સંગઠન લશ્કર-એ-તૈયબા (LET)ના સહ-સ્થાપક પણ છે.

હાફિઝ સઈદના ઈસ્લામિક આતંકવાદી સંગઠન લશ્કર-એ-તૈયબા (LET)ને વિશ્વના ઘણા દેશોએ આતંકવાદી સંગઠન જાહેર કર્યું છે. જેમાં ભારત, અમેરિકા, યુરોપિયન યુનિયન, ઓસ્ટ્રેલિયા અને રશિયાનો સમાવેશ થાય છે. આ સિવાય સંયુક્ત રાષ્ટ્ર સુરક્ષા પરિષદ પણ LETને આતંકવાદી સંગઠન માને છે. હાફિઝ સઈદના પુત્ર વિશે કેટલાક સોશિયલ મીડિયા હેન્ડલ્સ પર દાવો કરવામાં આવી રહ્યો છે કે, કમાલુદ્દીન સઈદની લાશ જબ્બા ઘાટી વિસ્તારમાંથી મળી આવી છે.


હાફિઝ સઈદ મુંબઈ હુમલાનો માસ્ટર માઈન્ડ છે. 26 નવેમ્બર 2008ના રોજ થયેલા આ હુમલામાં 18 સુરક્ષાકર્મીઓ સહિત 166 લોકો માર્યા ગયા હતા, જ્યારે 300થી વધુ લોકો ઘાયલ થયા હતા. માર્યા ગયેલાઓમાં ઘણા દેશોના નાગરિકો પણ સામેલ હતા. આ સાથે હાફિઝ સઈદ આતંકી સંગઠન લશ્કર-એ-તૈયબાનો પણ લીડર છે. અમેરિકાએ હાફિઝ પર 10 મિલિયન યુએસ ડોલરનું ઈનામ રાખ્યું છે.

હાફિઝ જમાત-ઉદ-દાવાની આડમાં આતંકવાદની ફેક્ટરી ચલાવે છે. લાહોરથી માંડ 50 કિલોમીટરના અંતરે મુરીદકે નામનું એક નગર છે. આ શહેર અંગ્રેજોએ 1910માં વસાવ્યું હતું. આ શહેરની મધ્યમાં હાફિઝ સઈદની આતંકી ફેક્ટરી ચાલે છે. હાફિઝ સઈદના સંગઠન જમાત ઉદ દાવાનું મુખ્યાલય મુરીદકેમાં છે. હાફિઝ અહીં એક મોટી મદરેસા ચલાવે છે, પરંતુ આ માત્ર દેખાડો કરવા માટે છે. હકીકતમાં મદરસાની આડમાં પાકિસ્તાનના દરેક ખૂણેથી કટ્ટરપંથીઓને અહીં લાવવામાં આવે છે, જેમને આતંકવાદની સંપૂર્ણ તાલીમ આપવામાં આવે છે.

(1:05 pm IST)