નવી દિલ્હી તા. ૧ : લાંબી રાહ જોયા બાદ અંતે ભારતમાં 5G સર્વિસ લોન્ચ થઇ છે. વડાપ્રધાન નરેન્દ્રભાઇ મોદી ઇન્ડિયન મોબાઇલ કોંગ્રેસ ૨૦૨૨ની શરૂઆત કરીને દેશમાં 5Gની સર્વિસ પણ લોન્ચ કરી છે. તેની સાથે જ દેશના અનેક શહેરોમાં 5Gની સર્વિસ મળશે. લોન્ચીંગની સાથે ભારત પણ 5G નેટવર્ક દેશોની લિસ્ટમાં સામેલ થયું છે. આ પ્રસંગે પીએમ મોદીએ 5G નેટવર્ક પર વીડિયો કોલની મદદથી મહારાષ્ટ્રમાં શાળાના બાળકો સાથે વાતચીત કરી. આ કોલ જિયોના નેટવર્ક પર કરવામાં આવ્યો હતો. ઇન્ડિયન મોબાઇલ કોંગ્રેસની શરૂઆત ૧ ઓકટોબર દિલ્હીના પ્રગતિ મેદાનમાં થઇ છે. આ કાર્યક્રમ ૪ ઓકટોબર સુધી ચાલશે. આ કાર્યક્રમમાં પીએમ મોદી પહોંચ્યા અને વિવિધ કંપનીઓને સ્ટોલ પર ઉપકરણો વિશે જાણકારી લીધી.
આ પ્રસંગે કેન્દ્રીય સંચાર, ઈલેક્ટ્રોનિક્સ અને ઈન્ફોર્મેશન ટેકનોલોજી મંત્રી અશ્વિની વૈષ્ણવ પણ હાજર હતા. પ્રથમ તબક્કામાં ભારતના ૧૩ શહેરોમાં ૫ઞ્ સેવા શરૂ કરવામાં આવી રહી છે. પ્રથમ તબક્કામાં અમદાવાદ, બેંગલુરુ, ચંદીગઢ, ચેન્નાઈ, દિલ્હી, ગાંધીનગર, ગુરૂગ્રામ, હૈદરાબાદ, જામનગર, કોલકાતા, લખનૌ, મુંબઈ અને પુણેમાં 5G સેવા શરૂ થશે. દરમિયાન, ઉદ્યોગપતિ મુકેશ અંબાણીએ કહ્યું કે, Jio ડિસેમ્બર ૨૦૨૩ સુધીમાં સમગ્ર ભારતમાં 5G સેવાઓ શરૂ કરશે.
વડાપ્રધાન નરેન્દ્ર મોદીએ શનિવારે ભારતમાં 5G ઈન્ટરનેટ સેવા શરૂ કરી છે. તેમણે કહ્યું કે ડિજિટલ ઈન્ડિયા અને આત્મનિર્ભર ભારતના વિઝનમાં આ એક મોટું પગલું છે. પીએમ મોદીએ કહ્યું, ‘ઘણા લોકોએ મારા આત્મનિર્ભર ભારતના સપનાની મજાક ઉડાવી... લોકો માનતા હતા કે ટેક્નોલોજી ગરીબો માટે નથી. પરંતુ હું માનતો હતો કે ટેક્નોલોજી દરેક ઘર સુધી પહોંચી શકે છે.' ડિજિટલ ઈન્ડિયાના ૪ સ્તંભો વિશે વાત કરતાં પીએમ મોદીએ કહ્યું કે, અમે ડિજિટલ ડિવાઇસની કિંમત, કનેક્ટિવિટી, ડેટાની કિંમત અને ડિજિટલના વિઝન પર ભાર મૂક્યો હતો.
દેશના ૧૩ શહેરોમાં 5G સેવા શરૂ કરતા પીએમ મોદીએ કહ્યું કે, ‘ભારતની ૨૧મી સદી માટે આજનો દિવસ ઐતિહાસિક છે કારણ કે 5G ટેક્નોલોજી ટેલિકોમ સેક્ટરમાં ક્રાંતિ લાવશે. આ ડિજિટલ ઈન્ડિયાની સફળતા છે. ગામડાઓ 5Gના ઐતિહાસિક લોન્ચમાં ભાગ લઈ શકશે તે જોઈને આનંદ થયો.'
પીએમ મોદીએ કહ્યું કે ભારત માત્ર ટેક્નોલોજીનો ઉપભોક્તા જ નહીં પરંતુ ટેક્નોલોજીના વિકાસમાં અને વાયરલેસ ટેક્નોલોજીની ડિઝાઇનમાં મુખ્ય ભૂમિકા ભજવશે. ભારત મોબાઈલ ફોનનો બીજો સૌથી મોટો ઉત્પાદક દેશ છે અને ભારત મોબાઈલ ફોનની નિકાસ પણ કરી રહ્યું છે, વડાપ્રધાને કહ્યું કે, આ તમામ પ્રયાસોથી ભારતમાં મોબાઈલ ફોન પોસાય તેવા બન્યા છે.
પીએમ મોદીએ કહ્યું કે તેમણે એક વીડિયો જોયો જેમાં એક ભિખારી પણ ડિજિટલ પેમેન્ટ લઈ રહ્યો હતો. તેમણે જણાવ્યું કે કેવી રીતે નાના વેપારીઓ પણ હવે ડિજિટલ ટ્રાન્ઝેક્શન કરી રહ્યા છે. પીએમ મોદીએ કહ્યું કે ગામડાઓમાં ઈન્ટરનેટ યુઝર્સની સંખ્યા શહેરી વિસ્તારોની સરખામણીએ ઝડપથી વધી રહી છે.
પીએમ મોદીએ કહ્યું કે ૨૦૧૪માં ભારતમાં માત્ર બે મોબાઈલ મેન્યુફેક્ચરિંગ યુનિટ હતા. આ સંખ્યા હવે ૨૦૦ને પાર કરી ગઈ છે. ભારત આત્મનિર્ભર બનવા સાથે ડેટાની કિંમતમાં પણ ઘટાડો થયો છે. ૨૦૧૪માં 1GB ડેટાની કિંમત રૂા. ૩૦૦ હતી પરંતુ હવે તે ઈં ૧૦ થઈ ગઈ છે. પીએમ મોદીએ કહ્યું, ‘ઇન્ટરનેટ યુઝર્સ હવે દર મહિને 14GB વાપરે છે. ૨૦૧૪માં તેની કિંમત રૂા. ૪,૨૦૦ પ્રતિ મહિને હતી. પરંતુ હવે તેની કિંમત રૂા. ૧૨૫ થી રૂા. ૧૫૦ વચ્ચે છે.'
પીએમ મોદીએ ઇન્ડસ્ટ્રીઝ અને સ્ટાર્ટઅપ્સને વિનંતી કરી કે કેવી રીતે કોલિંગ અને વીડિયો જોવા સિવાય રોજિંદા જીવનમાં 5G લાવી શકાય. પીએમ મોદીએ કહ્યું, ‘તે એક ક્રાંતિ બનવી જોઈએ. તે માત્ર રીલ જોવા સુધી મર્યાદિત ન હોવી જોઈએ.'
ભારતી એન્ટરપ્રાઇઝિસના સ્થાપક-ચેરમેન સુનિલ ભારતી મિત્તલે કહ્યું કે આ એક મહત્વપૂર્ણ દિવસ છે. એક નવા યુગની શરૂઆત થઈ રહી છે. આ શરૂઆત આઝાદીના ૭૫માં વર્ષમાં થઈ રહી છે અને દેશમાં એક નવી જાગૃતિ, ઉર્જાનો પ્રારંભ થશે. તેનાથી લોકો માટે ઘણી નવી તકો ખુલશે.
આદિત્ય બિરલા ગ્રૂપના ચેરમેન કુમાર મંગલમ બિરલાએ જણાવ્યું હતું કે ટેલિગ્રામ ઉદ્યોગ ૧.૩ અબજ ભારતીયો અને હજારો સાહસોના ડિજિટલ સપનાઓને વધુ સળગાવશે. આનાથી આગામી ૩ વર્ષમાં એક ટ્રિલિયન ડોલરના યોગદાન સાથે દેશ ૫ ટ્રિલિયન ડોલરની અર્થવ્યવસ્થા બનવાનો તખ્તો તૈયાર કરશે.
આ સિવાય મુકેશ અંબાણીએ કહ્યું કે મારી દ્રષ્ટિએ 5G એ મૂળભૂત ટેક્નોલોજી છે જે આર્ટિફિશિયલ ઈન્ટેલિજન્સ, ઈન્ટરનેટ ઓફ થિંગ્સ, રોબોટિક્સ, બ્લોકચેન અને મેટાવર્સ જેવી ૨૧મી સદીની અન્ય ટેક્નોલોજીની સંપૂર્ણ ક્ષમતાને અનલોક કરવામાં મદદ કરશે.