Gujarati News

નવી દિલ્હી : 2012ના દિલ્હીના બહુચર્ચિત નિર્ભયા ગેંગરેપ કેસમાં નિર્ભયાના માતાપિતા વતી કેસ લડનાર વકીલે જણાવ્યું હતું કે તેમને હાથરસ ગેંગરેપ પીડિતાના પરિવાર દ્વારા બોલાવવામાં આવ્યા છે. જો કે, તેમણે ઉત્તર પ્રદેશના વહીવટી તંત્ર પર આરોપ લગાવ્યો છે કે તેમને પીડિતાના પરિવારને મળવાની પરવાનગી નથી આપી રહ્યું.

એડવોકેટ સીમા કુશવાહાએ  મીડિયા સાથે વાત કરતાં કહ્યું હતું કે પીડિત પરિવાર ઇચ્છે છે કે તેઓ કાયદાની સાથે ઉભા રહે, પરંતુ વહીવટીતંત્ર તેમને મળવાની પરવાનગી નથી આપી રહ્યું. કુશવાહાએ વધુમાં કહ્યું કે- "વહીવટી તંત્ર દ્વારા મને હાથરસના પીડિત પરિવાર સાથે મળવાની છૂટ નથી મળી રહી. એવું કહેવામાં આવી રહ્યું છે કે આનાથી કાયદો અને વ્યવસ્થાને અસર થશે. "

અહીં હાથરસ ગેંગરેપ કેસમાં મેડિકલ રિપોર્ટ બાદ ફોરેન્સિક સાયન્સ લેબોરેટરી (એફએસએલ) ના રિપોર્ટ બાદ આ કેસમાં નવો વળાંક સામે આવ્યો છે. ઉત્તર પ્રદેશના એડીજી લો એન્ડ ઓર્ડર પ્રશાંત કુમારે કહ્યું કે એફએસએલ રિપોર્ટમાં બળાત્કારની પુષ્ટિ નથી. તબીબી અહેવાલમાં પણ બળાત્કારની પુષ્ટિ થઈ નથી.

ગુરુવારે મીડિયા સાથે વાત કરતા એડીજી પ્રશાંત કુમારે કહ્યું કે, 'પીડિત મહિલાનું પોસ્ટ મોર્ટમ દિલ્હીમાં થયું હતું. પરિવારના સભ્યોની સંમતિ બાદ અંતિમ સંસ્કાર કરવામાં આવ્યા હતા. પોસ્ટ મોર્ટમ રિપોર્ટમાં ગળાની ઇજા અને તેનાથી થતાં આઘાતને મૃત્યુનું કારણ ગણાવ્યું છે. દરમિયાન, ફોરેન્સિક સાયન્સ લેબોરેટરીનો રિપોર્ટ પણ મળ્યો છે. તે સ્પષ્ટ જણાવે છે કે જે નમૂના લેવામાં આવ્યા છે તેમાં કોઈ વીર્ય અથવા શુક્રાણુ મળ્યાં નથી. '

પ્રશાંત કુમારે વધુમાં કહ્યું કે, 'તે સ્પષ્ટ છે કે રાજ્યમાં જાતિય તણાવ પેદા કરવા કેટલાક લોકો દ્વારા આવી વસ્તુઓ ખોટી રીતે ઉભી કરવામાં આવી રહી છે. પોલીસે શરૂઆતથી જ તુરંત કાર્યવાહી હાથ ધરી છે. હવે અમે આગળની કાનૂની કાર્યવાહી કરીશું. આવા લોકોની ઓળખ કરવામાં આવશે કે જેઓ રાજ્યમાં સામાજિક સંવાદિતાને ખલેલ પહોંચાડવા માંગતા હતા અને જાતીય હિંસા ભડકાવવા માંગતા હતા.