Gujarati News

Gujarati News

News of Wednesday, 1st July 2020

ચીનથી આવતા પાર્ટસ બંધ થઇ જતાં સ્માર્ટફોન-ઇલેકટ્રોનિક ફેકટરીઓ ચિંતામાં

ફેકટરીઓ બંધ કરવી પડે તેવી સ્થિતિ : શાઓમી, ઓપ્પો, રિયલમી, હાયર અને કેરિયર મીડિયા જેવી બ્રાન્ડસના કોમ્પોનન્ટ એક સપ્તાહ કરતાં વધારે સમયથી કસ્ટમ કિલયરન્સના વાંકે અટવાયા છે જેથી ઉત્પાદન યોજનાને અસર થઈ છે

કોલકાતા, તા.૧: ચીનથી આયાત થતા કન્સાઇનમેન્ટના કિલયરન્સમાં ભારે વિલંબ થઈ રહ્યો હોવાથી ઇલેકટ્રોનિકસ ઉદ્યોગ સંકટમાં મુકાઈ શકે છે. કેટલીક સ્માર્ટફોન અને ઇલેકટ્રોનિક ફેકટરીઓમાં વપરાતા કોમ્પોનન્ટ ખતમ થવાના આરે છે તેથી પ્લાન્ટ બંધ થઈ શકે છે. કેટલાક ઉત્પાદકોએ કહ્યું કે તેઓ ચાલુ સપ્તાહમાં જ કદાચ ઉત્પાદન અટકાવી દેશે.

ઉદ્યોગના કેટલાક એકિઝકયુટિવે જણાવ્યું કે શાઓમી, ઓપ્પો, રિયલમી, હાયર અને કેરિયર મીડિયા જેવી બ્રાન્ડ્સના કોમ્પોનન્ટ એક સપ્તાહ કરતાં વધારે સમયથી કસ્ટમ કિલયરન્સના વાંકે અટવાયા છે જેથી ઉત્પાદન યોજનાને અસર થઈ છે. કાર્બન સ્માર્ટફોન્સના માલિક અને સાન્સુઇ ટીવી ઉત્પાદનનું લાઇસન્સ ધરાવતા જૈના ગ્રૂપે ગયા શુક્રવારે તેનો પ્લાન્ટ બંધ કરી દીધો હતો.

જૈના ગ્રૂપના ચેરમેન પ્રદીપ જૈને જણાવ્યું કે, 'કસ્ટમ દ્વારા માલને અટકાવી રાખવામાં આવે તે એકદમ બિનજરૂરી મુદ્દો છે. તેનાથી અમારા બિઝનેસને અને રોજગારીને વિપરીત અસર થશે.'

જૈના ગ્રૂપ કેટલીક થર્ડ પાર્ટી બ્રાન્ડ્સ માટે કોન્ટ્રાકટ મેન્યુફેકચરિંગ કરે છે. તેમણે કહ્યું કે, 'અમે કોવિડ ૧૯ પછી અમારું ઉત્પાદન વધારવા માટે પહેલેથી કેટલાક પડકારોનો સામનો કરીએ છીએ. સોશિયલ ડિસ્ટન્સિંગના નિયમો અને માઇગ્રન્ટ કામદારોની અછત પણ પરેશાની પેદા કરે છે.'

એક અગ્રણી કોન્ટ્રાકટ મેન્યુફેકચરરે જણાવ્યું કે તેને ત્યાં આગામી બે-ત્રણ દિવસમાં જ મોબાઇલ ફોન માટેના કોમ્પોનન્ટ ખતમ થઈ જશે. પોતાની ફેકટરી ચલાવતી એક અગ્રણી ચાઇનીઝ બ્રાન્ડે કહ્યું કે તેઓ માત્ર છ દિવસ સુધી ઉત્પાદન ચાલુ રાખી શકે તેમ છે.

લગભગ ૧૫ બ્રાન્ડ્સ માટે એલઇડી ટીવીનું ડિઝાઇન અને ઉત્પાદન કાર્ય સંભાળતી વિડિયોટેકસ ઇન્ટરનેશનલે જણાવ્યું કે તેણે ગુરુવારથી ઉત્પાદન બંધ કરવું પડશે, સિવાય કે ચીનથી આવેલા કન્સાઇનમેન્ટને તાત્કાલિક કિલયરન્સ આપવામાં આવે.

કસ્ટમ્સ ડિપાર્ટમેન્ટે હાલમાં ચીનથી આવેલા દરેક કન્સાઇનમેન્ટ ખોલીને તેની વિગતવાર ચકાસણી કરવાનો નિર્ણય લીધો છે. તેના કારણે બંદરો અને એરપોર્ટ પર માલનો ભરાવો થયો છે. અગાઉ કન્સાઇનમેન્ટને માત્ર એક કે બે દિવસમાં મંજૂરી મળી જતી હતી. ભારત-ચીન સરહદે સંદ્યર્ષમાં ૨૦ ભારતીય સૈનિકોના મૃત્યુ પછી ચાઇનીઝ માલ અને ઉત્પાદનોનો બહિષ્કાર કરવાની વાતો થઈ રહી છે ત્યારે કસ્ટમ્સ દ્વારા કિલયરન્સ કામગીરી જટિલ બનાવવામાં આવી છે.

કસ્ટમ્સના વિલંબના કારણે કેટલીક બ્રાન્ડ્સ માટે ઉત્પાદનકાર્ય ચાલુ રાખવું મુશ્કેલ બન્યું છે કારણ કે તેમની પાસે પહેલેથી મોટો જથ્થો હોતો નથી. તેઓ જરૂર પડે ત્યારે જ માલની આયાત કરતી હોય છે. સોશિયલ ડિસ્ટન્સિંગના નિયમોના કારણે સ્માર્ટફોન જેવા ડિવાઇસની ભારે અછત સર્જાઈ છે કારણ કે ફેકટરીઓ માત્ર ૪૦ ટકા ક્ષમતાએ કામ કરી રહી છે.

એક ચાઇનીઝ ઇલેકટ્રોનિકસ બ્રાન્ડના સીઇઓએ કહ્યું કે તેમણે ભવિષ્યના સપ્લાય ચેઇનના આયોજનમાં કસ્ટમ્સ કિલયરન્સના વિલંબને ગણતરીમાં લઈ લીધો છે. પરંતુ હાલના કોમ્પોનન્ટને કિલયરન્સ નહીં મળે તો ઉત્પાદન ઠપ થઈ જશે.

(3:50 pm IST)