Gujarati News

Gujarati News

News of Saturday, 1st May 2021

એકટર બિક્રમજીત કંવરપાલનું નિધન

કોરોનાએ વધુ એક બોલિવુડ હસ્તીનો જીવ લીધો

મુંબઇ તા. ૧ : કોરોના વાયરસ બોલિવૂડ અને ટીવી ઈન્ડસ્ટ્રી પર કહેર ફેલાવી રહ્યો છે. હાલમાં જ બોલિવૂડમાંથી એક દુખદ સમાચાર સામે આવ્યા છે. અભિનેતા બિક્રમજિત કંવરપાલનું કોરોનાને કારણે અવસાન થયું છે. અભિનેતાએ ૫૨ વર્ષની વયે અંતિમ શ્વાસ લીધા. અભિનેતા અશોક પંડિત અને વિક્રમ ભટ્ટે આ અંગે શોક વ્યકત કર્યો છે.

અશોક પંડિતે ટ્વિટ કર્યું – 'સાંભળીને દુઃખ થયું. મેજર બિક્રમજિત કંવરપાલનું આજે સવારે કોવિડથી કોરોનાને કારણે અવસાન થયું છે. નિવૃત્ત આર્મી ઓફિસર કંવરપાલે ઘણી ફિલ્મો અને ટીવી સિરિયલોમાં સહાયક ભૂમિકાઓ ભજવી હતી. તેમના પરિવાર અને નજીકના લોકો પ્રત્યે મારી સંવેદનાય.'

વિક્રમ ભટ્ટે ટ્વિટ કરીને લખ્યું છે – 'મેજર બિક્રમજિત કંવરપાલનું નિધન થયું છે. આ રોગચાળાએ તેમને આપણાથી છીનવી લીધા. મેં તેમની સાથે ઘણી ફિલ્મો કરી. વિક્રમે આગળ લખ્યું છે કે 'આપણે ગુમાવેલા દરેક જીવન ફકત એક નંબર નથી. અમે તેને નંબર બનવાની મંજૂરી આપી શકતા નથી. દરેકનો ખાસ મિત્ર, તેના આત્માને શાંતિ મળે.' આ સાથે, તેમણે #Covid #Covid19 #CovidIndia હેશટેગનો ઉપયોગ કર્યો. ફેન્સ આ ટ્વીટ્સને લાઇક કરી રહ્યા છે અને દુઃખ વ્યકત કરી રહ્યા છે.

તમને જણાવી દઇએ કે ભારતીય સૈન્યમાંથી નિવૃત્ત થયા પછી, બિક્રમજીત કંવરપાલે વર્ષ ૨૦૦૩ માં અભિનયની શરૂઆત કરી હતી. બિક્રમજિતે પેજ ૩, રોકેટ સિંઘ : સેલ્સમેન ઓફ ધ યર, રિઝર્વેશન, મર્ડર ૨, ૨ સ્ટેટ્સ અને ધ ગાઝી એટેક જેવી ફિલ્મોમાં કામ કર્યું હતું. આ સિવાય બિક્રમજીતે દીયા ઓર બાતી હમ, યે હૈ ચાહતેં, દિલ હી તો હૈ માં પણ મુખ્ય ભૂમિકા ભજવી હતી.

(3:52 pm IST)