અફઘાનિસ્તાનમાં તાલિબાનને ટૂંકસમયમાં મજબૂત વિપક્ષનો સામનો કરવાની નોબત આવી શકે છે
નવી દિલ્હી: અફઘાનિસ્તાનમાં તાલિબાને સત્તા તો કબ્જે કરી લીધી છે પણ તેને બહુ જલ્દી મજબૂત રાજકીય વિપક્ષનો સામનો કરવાનો વારો આવી શકે છે. એવુ કહેવાઈ રહ્યુ છે કે, પૂર્વ રાષ્ટ્રપતિ હમિદ કરજાઈ, ડો.અબ્દુલ્લાહ તેમજ તાલિબાન વિરોધી રેસિસટન્સ ફોર્સના નેતા અહેમદ મસૂદ તેમજ પૂર્વ ઉપરાષ્ટ્રપતિ અમરુલ્લા એક બીજાના સંપર્કમાં છે. ગની સરકારના સમયગાળામાં 70 દેશોમાં રાજદૂત તરીકે તેનાત થયેલા લોકો પણ આ વાતચીતમાં સામેલ છે અને બહુ જલ્દી તાલિબાન સામે એક મજબૂત રાજકીય વિકલ્પ ઉભો થઈ શકે છે. સૂત્રોના કહેવા પ્રમાણે અફઘાનિસ્તાન બહાર આ ગઠબંધન નિર્વાસિત સરકાર પણ બનાવી શકે છે. આ હિલચાલના પગલે દુનિયાના બીજા દેશો તાલિબાનને માન્યતા આપવામાં ઉતાવળ પણ નહીં કરે. સૂત્રોનુ કહેવુ છે કે, તમામ દાવા પછી પણ તાલિબાનની સરકાર વ્યાપક રીતે પ્રભાવ ઉભો કરી શકી નથી. મહિલાઓને પણ તેમના હક આપવામાં આવી રહ્યા નથી અને તાલિબાન દ્વારા લોકો પર અત્યાચાર કરવામાં આવી રહ્યા છે ત્યારે તાલિબાન સામે રાજકીય વિકલ્પ ઉભો કરવો જરૂરી છે.