સોશિયલ મીડિયામાં જોવા મળી શ્વાન અને બિલાડીની અનોખી દોસ્તી

નવી દિલ્હી: શ્વાન અને બિલ્લી સાથે ભાગ્યે જ દોસ્તી થાય, પણ કેસ્પર નામના હસમુખા ડોગી અને તુંડમિજાજી બિલાડા રોમિયો વચ્ચે જબરી ધનિષ્ઠ મિત્રતા છે. તેમની આ મિત્રતાએ ઈન્સ્ટાગ્રામ પર ભારે તરખાટ મચાવ્યો છે. વાસ્તવમાં છ વર્ષનો કેસ્પર અને બે વર્ષનો રોમિયો ન્યુઝીલેન્ડના ક્રિસ્ટચર્ચની 29 વર્ષની રિન્સાએ પાળેલાં પ્રાણીઓ છે. રિન્સા આ બન્ને ફોટો લઈ ઈન્સ્ટાગ્રામ પર અપલોડ કરતી રહેતી હોય છે.

 આ બન્ને લગભગ હંમેશા સાથે જ હોય છે. રિન્સાએ તેમના સોફા પર મસ્તી કરતાં, સાથે લોન્ગ વોક પર જતાં ફોટો લીધો છે. રિન્સા બન્નેને રોજના બે કલાક ફરવા લઈ જાય છે. આ દરમ્યાન આ બન્નેની મસ્તી જોવા અને માણવા જેવી હોય છે. ડોગી-બિલાડાની જોડીના 38,000થી વધુ ફોલોઅર્સ છે. રિન્સાનું ક્હેવું હતું કે તે હંમેશાથી એક કેટ પાળવા માંગતી હતી, પરંતુ કેસ્પર તેની સાથે શાંતિથી રહેશે કે નહી એ વિશે તે ચિંતીત હતી.