રૂપિયા આપો 'હગ' કરો
વધી રહી છે આ સર્વિસની ડિમાન્ડ
નવી દિલ્હી તા. ૨ : સંજુ બાબા ફિલ્મ 'મુન્ના ભાઈ MBBS'માં જાદૂની ઝપ્પી આપીને મોટી મોટી મુશ્કેલીઓને સરળતાથી દૂર કરતો દેખાય છે. ફિલ્મમાં દર્શાવવામાં આવ્યું છે કે કઈ રીતે સંજય દત્ત જાદૂની ઝપ્પી આપીને અસ્ત-વ્યસ્ત બનેલી વાતોને બરાબર કરી દે છે.
આપણા દેશમાં ભલે ગળે મળવું ફિલ્મ સુધી સીમિત હતું, પણ વિદેશોમાં ગળે મળવાની કળા પર રૂપિયા કમાવવા મળે છે અને લોકોની એકલતા અને ડિપ્રેશનને દૂર કરાય છે. પાછલા કેટલાક સમયથી અમેરિકામાં પ્રોફેશનલ કડલિંગના રુપમાં આવું કરિયર સામે આવ્યું છે, જયાં લોકો કલાકો સુધી હિસાબ પ્રમાણે કડલિંગ એટલે કે ગળે લાગે છે અને આવકનું સાધન બનાવી રહ્યા છે.
તમે મસાજ, બ્યુટીશિયન, મેનિકયોર, પેડિકયોર, સ્પા, કાઉન્સિલિંગ, સ્ટીમ બાથ, સોના બાથ, યોગ જેવી તમામ સેવાઓને રુપિયાની મદદ મેળવી શકાય છે, પણ પ્રોફેશનલ કડલિંગ તરીકે રુપિયા આપીને ગળે મળવાનો નુકખો વિદેશમાં પ્રચલિત અને લોકપ્રિય બની રહ્યો છે. અમેરિકામાં એક કલાક ગળે લાગવાનો ૮૦ ડોલર ચાર્જ વસુલવામાં આવે છે.
વિદેશમાં યોગા અને મેડિટેશનથી હટીને કડલિંગ એટલે કે ગળે લગાડવાની એક એવી વેલનેસ એકિટવિટી તરીકે લોકપ્રિય બની રહી છે, જેને થેરપ્યુટિક અથવા નોન સેકસ્યુઅલ ટચ તરીકે ઓળખવામાં આવે છે. આ એક પ્રકારની મેડિકલ અને સેકસથી ઉપરનો સ્પર્શ માનવામાં આવે છે, જે કલાયન્ટને સ્નેહ, પ્રેમ, હુંફ ગળે લાગવાથી સંતોષ આપે છે. આ સેશનમાં વર્બલ કે ફિઝિકલ સેકસ પર પાબંધી હોય છે.
આ સિલસિલો આજે નહીં પણ ૨૦૧૩માં ન્યુયોર્કમાં અસ્તિત્વમાં આવ્યો હતો, જયાં કડલિંગ પાર્ટીમાં કોઈને પણ જાદૂની ઝપ્પી આપવાની છૂટ હતી. આજે ઈન્ટરનેટ પર કડલિસ્ટ ડોટ કોમ, કડલકપ ડોટ કોમ, કલડ બડીઝ, કડલ સેન્ચ્યુરી, અકલ અપ ટૂ મી જેવી ઘણી વેબસાઈટ્સ છે, જયાં કડલિંગની સર્વિસ આપવામાં આવે છે.
એક જાણીતા મનોવૈજ્ઞાનિક કહે છે કે, 'હું આ સર્વિસને યોગ્ય નથી માનતો. આ તો જીવનને વેચવા જેવું છે. હદ છે હવે તમે સ્પર્શ પણ ભાડે લેશો? વિદેશોમાં આ સર્વિસ એટલા માટે પ્રચલિત થઈ રહી છે કારણ કે અહીં લોકો એકલા પડી રહ્યા છે. લોકોની પાસે પરિવાર નથી હોતો, કોઈ વાત કરવા માટે નથી હોતું, પણ આપણા ત્યાં તમે આવી ઝપ્પીની ઈચ્છા રાખશો તો તે માતા-પિતા, ભાઈ, બહેન, પ્રેમિકા કે કોઈ નજીકની વયકિત પાસેથી ઈચ્છશે. સ્પર્શનું માર્કેટિંગ કરવું મને અકુદરતી લાગે છે. હું આને નકામું અને બેકાર માનું છું. જો આ ચલણ વધી ગયું તો તમે તમારા જીવનની નાનામાં નાની જરુરિયાત માટે સર્વિસ લેવાનું શરુ કરી દેશો.'
જયારે કેટલાક લોકો તેના પક્ષમાં છે. માસ મીડિયાની એક વિદ્યાર્થિનીએ કહ્યું, 'મે એક કડલિંગ સાઈટની લિંક જોઈ હતી, જેમાં એક મહિલા કહી રહી હતી કે તેને તેના પતિ તરફથી આ પ્રકારનો ટચ નથી મળતો, માટે તે કડલિંગ સર્વિસિઝની સેવા લે છે. મારા હિસાબે આમાં ખોટું કશું નથી, તમે મસાજ પાર્લરમાં મસાજ કરાવો છો, જીમમાં જઈને તમારા ટ્રેનરની સાથે મળીને એકસર્સાઈઝ કરો છો, કાઉન્સિલર પાસે જઈને તમારા રહસ્યો ખુલ્લા મૂકો છો, તો કડલિંગ કેમ નહીં? તેનાથી મને સૌથી વધુ રસપ્રદ વાત એ લાગી કે કોઈ સંબંધ કે અપેક્ષાનો ભાર લીધા વગર ગળે લાગી શકો છો અને તેની નજીક રહી શકાય છે.'