Gujarati News

Gujarati News

News of Tuesday, 29th November 2022

અમેરિકામાં વિશ્વનો સૌથી મોટો જ્વાળામુખી સક્રિય થયો હોવાની માહિતી

નવી દિલ્હી: વિશ્વનો સૌથી મોટો સક્રિય જ્વાળામુખી હવાઈમાં મૌના લોઆ છે. મૌના લોઆ જ્વાળામુખી ફાટ્યો છે. આ જ્વાળામુખી ફાટવાથી આકાશ લાલ થઈ ગયું હતું. યુનાઈટેડ સ્ટેટ્સ જિયોલોજિકલ સર્વે (USGS)ના નિવેદન અનુસાર, મૌના લોઆના શિખર પરથી વિસ્ફોટ રવિવારે રાત્રે લગભગ 11.30 વાગ્યે શરૂ થયો હતો. જ્વાળામુખીના શિખર પર લાવા હજુ પણ બહાર આવી રહ્યો છે. હાલ સ્થાનિક લોકોને કોઈ ખતરો નથી. આ જ્વાળામુખી લગભગ 4 દાયકામાં પ્રથમ વખત ફાટ્યો છે. USGS મુજબ, પવન જ્વાળામુખીની રાખ અને ગેસને અન્યત્ર લઈ જઈ શકે છે. નિવેદનમાં વધુમાં કહેવામાં આવ્યું છે કે, 'ભૂતકાળની ઘટનાઓના આધારે, મૌના લોઆ વિસ્ફોટના પ્રારંભિક તબક્કા ખૂબ જ ગતિશીલ હોઈ શકે છે. લાવાના પ્રવાહનું સ્થાન અને ઝડપ વેગથી બદલાઈ શકે છે. જો વિસ્ફોટ હળવો હશે તો લાવા પણ ટોચ પર રહેશે. પરંતુ જો વિસ્ફોટ વધશે તો લાવા દિવાલોમાંથી બહાર આવશે અને ઝડપથી નીચે તરફ જશે. હવાઈની ઇમરજન્સી મેનેજમેન્ટ એજન્સી અને હવાઈની ટુરિઝમ ઓથોરિટી બંનેએ સોમવારે સવારે જણાવ્યું હતું કે વસ્તીવાળા વિસ્તારોમાં તાત્કાલિક કોઈ ખતરો નથી. નેશનલ વેધર સર્વિસ હોનોલુલુ શાખાએ જણાવ્યું હતું કે તે વિસ્ફોટ બાદ જમીન પર રાખના અહેવાલોની તપાસ કરી રહી છે. હવાઈના લોકોએ સોશિયલ મીડિયા પર જ્વાળામુખીના વિસ્ફોટથી સંબંધિત ફોટા અને વીડિયો શેર કર્યા છે. તે જોઈ શકાય છે કે હવાઈનું આકાશ સંપૂર્ણપણે લાલ રંગનું છે. સોશિયલ મીડિયા પર ઘણા લોકોએ લખ્યું છે કે જે રીતે લાવા વહી રહ્યો છે, તે આગની નદી જેવું લાગે છે.

(5:50 pm IST)