Gujarati News

પૉલ જૉહ્ન, અમદાવાદ: હવે સમય આવી ગયો છે કે સરકાર અને નાગરિકોએ ભેગા મળીને પ્લાસ્ટિકનો ઉપયોગ ઓછામાં ઓછો થાય તેના માટે પગલાં લેવા જોઈએ. પ્લાસ્ટિકના વધતા જતા ઉપયોગને કારણે 55 મીટર ઊંચો પિરાણાનો કચરાનો પર્વત હવે શહેર માટે ઝેરી ગેસ ચેમ્બર બનતો જાય છે. પિરાણામાં ઠાલવવામાં આવતા 72 લાખ ટન કચરામાંથી 12 ટકા પ્લાસ્ટિક હોય છે.

AMCના ગાર્બેજ કોમ્પોઝિશન રિપોર્ટ અનુસાર, પિરાણાંથી કલેક્ટ કરવામાં આવેલા 100 કિલો મિક્સ કચરામાં 8.3 ટકા પ્લાસ્ટિક કચરો હતો, 4.3 ટકા કચરો એવો હતો જેમાં પ્લાસ્ટિક, ટેક્સ્ટાઈલ, સિન્થેટિક્સનો ભાગ હતો. 54.2 ટકા કચરો ડિગ્રેડેબલ હતો, 10.15 કિલો રેતી હતી અને 5.3 કિલો રબર હતું.

રિપોર્ટમાં જણાવવામાં આવ્યું છે કે, પિરાણા સાઈટ પર કચરો સળગાવવાને કારણે જે ગેસ ઉત્પન્ન થાય છે તેનાથી કેન્સર થવાનો ખતરો વધી જાય છે. કચરામાંથી આટલા મોટા પ્રમાણમાં પ્લાસ્ટિક મળી આવવું એ નાગરિકો માટે ચિંતાનો વિષય છે.

બેંગ્લોરની યૂનિવર્સિટી ઓફ એગ્રીકલ્ચર સાયન્સના નિષ્ણાંતો દ્વારા 2016માં કરવામાં આવેલા એક અભ્યાસ અનુસાર, પોલિથિન, પોલિપ્રોપિલીન, પોલિસ્ટ્રીન જેવા પ્લાસ્ટિકને જો આ રીતે ફેંકવામાં આવે તો તે મોટા પ્રમાણમાં કાર્બન મોનોક્સાઈડનું ઉત્પાદન કરે છે. કચરાની સાથે ફેંકવામાં આવતા PVC મટિરિયલને કારણે ડાઓક્સિન્સ, કાર્બન બ્લેક જેવા રસાયણો ઉત્પન્ન થાય છે.

સ્ટડીમાં જણાવવામાં આવ્યું છે કે, વાતાવરણમાં ભળી જતા આ ગેસ અને હેવી મેટલ કેન્સર જેવા રોગને આમંત્રણ આપે છે. તાજેતરમાં પબ્લિશ કરવામાં એક અભ્યાસમાં જણાવ્યા અનુસાર, હાર્ટ અટેક માટે પણ હવાનું પ્રદૂષણ એ ત્રીજુ સૌથી મોટું કારણ છે. ‘The changing patterns of cardiovascular diseases and their risk factors in the states of India’ નામની આ સ્ટડીમાં દાવો કરવામાં આવ્યો છ કે, હાઈ કોલેસ્ટ્રોલ, હાઈ બોડી માસ ઈન્ડેક્સ અને ડાયાબિટિસ કરતા પણ વધારે ખતરો એર પોલ્યુશન છે.