Gujarati News

દેશના મોટા શહેરોમાં આજના સમયમાં તમારું મકાન બનાવવું સૌથી મોટી અને અઘરી ચેલેન્જ છે. ઘરનું ઘર બનાવવા લોકો પોતાના જીવનભરની કમાણી નાખી દે છે. તેમ છતા મકાનનું પઝેશન માટે વર્ષો રાહ જોવી પડે છે. અને ક્યારેક તો પઝેશન માટે કોર્ટના પણ ધક્કા ખાવા પડે છે. ત્યારે આ ટેક્નોલોજી તેમનું કામ ખૂબ સહેલું કરી શકે છે. તાજેતરમાં જ ઓસ્ટ્રેલિયામાં 180 ચો. મીટરમાં બનાવવામાં આવેલ એક ભવ્ય મકાનનું સંપૂર્ણ બાંધકામ માત્ર 72 કલાકમાં પૂર્ણ થઈ ગયું અને પઝેશન પણ મળી ગયું. જોકે આ કામ મજૂરો નહીં પણ રોબોટે કર્યું હતું.

ઓસ્ટ્રેલિયન કંપનીએ રોબોટ દ્વારા જે મકાન બનાવ્યું તેને બાંધવા માટે મજૂરોને ઓછામાં ઓછા 30 દિવસથી વધુનો સમય લાગે તેમ હતો. આ ઘટના દુનિયામાં પહેલીવાર છે કે જ્યારે કોઈ રોબોટે ઘરનું નિર્માણ કર્યું હોય. આ માટે ઓસ્ટ્રેલિયાની રોબોટિક ટેક્નોલોજી કંપની ફાસ્ટબ્રિક રોબોટિક્સ(FBR) લિ. દ્વારા વન આર્મ્ડ રોબોટના કોમર્શિયલ વર્ઝન હેડ્રિએન Xનો ઉપયોગ કરીને 180 ચો.મીટરના પ્લોટમાં 3BHKનો ઘરનું નિર્માણ કર્યું હતું.

ઓસ્ટ્રેલિયન સમાચાર પત્રોમાં આવેલ અહેવાલો અનુસાર હેડ્રિએન X રોબોટ કોઈપણ જાતના માનવીય દખલ વગર પણ દિવસ-રાત કામ કરી શકે છે. તે એક કલાકમાં 1000 ઈંટ રાખીને તેની દિવાલ બનાવી નાખે છે. જ્યારે આ જ કામ માટે બે-ત્રણ માણસોને એક-બે દિવસનો સમય લાગે છે. આ રોબોટ ફક્ત ઇંટોની દિવાલ બનાવે છે તેવું નથી પણ જરુરિયાત મુજબ ઇંટોને યોગ્ય આકારમાં કાપવી અને યોગ્ય તરીકે મકાનના શેપમાં ફિટ કરવાનું કામ પણ કરે છે. ત્યારે મોટી મોટી ઈમારત બનાવતા બિલ્ડર્સને કોમર્શિયલ રુપે આ રોબોટ ખૂબ કામ આપી શકે છે. આ રોબોટના ઉપયોગથી ગ્લોબલ કંસ્ટ્રક્શન માર્કેટમાં ખળભળાટ મચી શકે છે. તેમજ મકાન બનાવવાનો ખર્ચ પણ અડધોઅડધ ઘટી શકે છે જેના કારણે સસ્તા મકાન પણ ઉપલબ્ધ થઈ શકે છે.

આ રોબોટ દ્વારા બનાવેલ ઘરનું નિરિક્ષણ આંતરરાષ્ટ્રીય કક્ષાની એન્જિનીયરિંગ કન્સલ્ટન્સીએ કર્યું હતું અને તેમના જણાવ્યા મુજબ આ ઘર દરેક પ્રકારના ધારાધોરણ પર ખરું ઉતર્યું છે. ઘર નિર્માણ કરાવતા પહેલા આ રોબોટનું અનેકવાર ફેક્ટરી એક્સેપ્ટન્સ ટેસ્ટિંગ પણ કરવામાં આવ્યું છે. જ્યારે આ રોબોટ બનાવનાર કંપનીનું કહેવું છે કે તેમની આ ટેક્નોલોજી માટે દુનિયામાં ખૂબ મોટું બજાર પહેલાથી જ રાહ જોઈ રહ્યું છે.

આ જ વર્ષમાં માર્ચ મહિનામાં સ્ટાર્ટઅપ કંપની ICON દ્વારા 3D પ્રિન્ટિંગ રોબોટની મદદથી ઘરના જુદા જુદા ભાગનું નિર્માણ કરી તેને એકબીજા સાથે જોડીને મકાનનું ખોખું તૈયાર કરવામાં આવ્યું હતું. 650 સ્ક્વેર ફૂટના આ મકાનની દિવાલ, છત અને ફ્લોર તૈયાર કરવામાં રોબોટને ફક્ત 12 કલાક લાગા હતા. પાછળથી આ ખોખામાં વર્કર્સે બારી, દરવાજા, નળ અને ઇલેક્ટ્રિસિટીનું ફિટિંગ કરી ઘર તૈયાર કરી દીધું હતું.