Gujarati News

બીજીંગ તા. ૧૪ :.. ચીનના ગુઆંગડોન્ગ ટાઉનમાં રહેતા ર૬ વર્ષના ચેન્ગ નામના યુવક સાથે ગયા વીક-એન્ડ દરમ્યાન જબરો હાદસો થયો. ભાઇસાહેબ શુક્રવારની સાંજે દોસ્તો સાથે પાર્ટી કરવા ગયા અને દબાવીને દારૂ ઢીંચ્યો. માંડ-માંડ ઘરે પહોંચ્યા અને ઘરે જઇને લોક ખોલવા માટે ખિસ્સામાંથી ઘરની ચાવી ફંફોસી. ખાસ્સી વાર શોધ્યા પછી ચાવી ન મળી એટલે તેમણે ફોન કરીને પરિવારજનોને ઉઠાડયા અને દરવાજો ખોલવાનું કહ્યું. ઘરમાં જઇને પથારીમાં પડતાં જ તે કયાં પોઢી ગયો એની તેને પણ ખબર ન પડી. જો કે સવારે ઉઠયો અને દારૂની અસર ઓસરી ત્યારે તેને છાતીમાં તીવ્ર દુખાવો થવા માંડયો. તરત તે ડોકટર પાસે ગયો. હાર્ટની તકલીફ તો નહોતી લાગતી એટલે ડોકટરોએ ચેસ્ટનો એકસ-રે કાઢયો તો ચોંકી જ ગયા. ડોકટરે પુછયું કે ભાઇ તમારી કોઇ ચાવી ખોવાઇ છે? ચેન્ગને નવાઇ લાગી કે ગઇકાલે રાતે ઘરે આવતી વખતે તેને ઘરની ચાવી નહોતી મળી એની આ ડોકટરને કઇ રીતે ખબર પડી? ત્યારે ડોકટરે એકસ-રે બતાવીને કહયું કે લો, તમારી ચાવી આ રહી. અન્નનળીમાં વચ્ચે ફસાઇ ગયેલી ચાવી જોઇને ચેન્ગ પણ હેબતાઇ ગયો. તેને યાદ જ નથી કે પોતે કયારે ચાવી ગળી ગયો.

ખેર, તે કઇ રીતે ગળી ગયો એ મહત્વનું નહોતું પણ હવે એ કાઢવી કઇ રીતે એ મોટો કોયડો હતો. શરૂઆતમાં ડોકટરોએ ગેસ્ટ્રોસ્કોપ દ્વારા કાઢવાનો પ્રયત્ન કર્યો, પણ આડી ચાવી ફસાઇ ગઇ. આખરે ડોકટરોએ તેને જનરલ એનેસ્થેસિયા આપીને અંદરના સ્નાયુઓને શિથિલ કર્યા અને એન્ડોસ્કોપથી ચાવી ખેંચી કાઢી.