Gujarati News

Gujarati News

News of Monday, 11th February 2019

૪૦ વર્ષે પહોંચી ગયા છો ? જીવનશૈલી નહિ બદલો તો પસ્તાશો : શરીર રોગોનું ઘર બની જશે

હવે ધ્યાન નહિ આપો તો કયારે ? શું કહે છે ડોકટરો

નવી દિલ્હી તા. ૧૧ : શું તમે જાણો છો કે મિડલ એજ જીવનનો ટર્નિંગ પોઈન્ટ છે. આ સમયગાળામાં તમે કયાં છો અને કયાં પહોંચવું છે. શું મેળવ્યું છે અને શું મેળવવાનું બાકી છે. આ ઉંમર દરમિયાન જ શરીરમાં રોગોનું ઘર થવાનું શરૂ થાય છે. NHS એકસપર્ટ ડો. મુઈર ગ્રે (Dr. Muir Gray)ના મતે, '૪૦ વર્ષે ઉંમરની અસર દેખાવા લાગે છે. એટલે જ આ ઉંમરે જીવશૈલીમાં થોડા ફેરફાર કરવા જરૂરી છે.' ૪૦ અને ૫૦ વર્ષની ઉંમરે પહોંચેલા લોકો સેન્ડવિચ જનરેશન છે. એક તરફ માતા-પિતા અને બીજી બાજુ બાળકો. નોકરીના આઠ કલાક ડેસ્ક પર બેસીને કામ કરવાનું અને ટેન્શન તો હોય જ. ૪૦ વર્ષથી જીવનનો એવો તબક્કો શરૂ થાય છે જેમાં બધું જ મેળવવામાં સ્વાસ્થ્ય પ્રત્યે બેદરકાર થઈ જઈએ છીએ. પરિણામરૂપે શરીર રોગોનું ઘર બને છે.

ડો. ગ્રેએ કહ્યું, '૩૦થી ૬૦ વર્ષની વચ્ચે શારીરિક કસરતના અભાવે તંદુરસ્તી નબળી પડે છે. એટલે અઠવાડિયામાં ઓછામાં ઓછો અઢી કલાક કસરત પાછળ ફાળવવો જોઈએ. એક વખતમાં ૧૦ મિનિટ કે તેથી વધુ સમય સુધી સતત શારીરિક શ્રમ કરવો.' જો આ ઉંમરે સ્વાસ્થ્યનું ધ્યાન નહીં રાખો તો સ્ટ્રોક, ટાઈપ ૨ ડાયાબિટીસ, ડિપ્રેશન, હૃદયરોગ અને અમુક પ્રકારના કેન્સરનો શિકાર બનશો. કસરત સ્વાસ્થ્ય સંબંધિત સમસ્યાનો ઉકેલ છે. પણ આપણે કસરત કરવામાં આળસ કરીએ છીએ. ભારે કસરતો ન કરવી હોય તો જીવનશૈલીમાં નાના-નાના ફેરફારો કરશો તો પણ લાભ થઈ શકે છે.

શરીરને થોડું કષ્ટ આપો! :  ચાલવા જવાનો સમય ન મળતો હોય તો ઓફિસમાં લંચટાઈમ બાદ ૧૦ મિનિટ આંટા મારો. લિફટના બદલે પગથિયાનો ઉપયોગ કરો.

4S વિશે વિચારો : સ્ટ્રેન્થ (તાકાત), સપલનેસ (લવચીકતા), સ્ટેમિના અને સ્કીલ. સર્કિટ ટ્રેનિંગ, એરોબિકસ, દોડવું, ફૂટબોલ, નેટબોલ, સ્વિમિંગ, યોગા, પિલાટ્સ વગેરે કરો. તમને જે પસંદ હોય તે રમત રમો પણ શારીરિક શ્રમ થાય તેવું કરો.

બેસવાનું ટાળો : બેસવાથી એક મિનિટમાં એક કેલરી વપરાય છે જયારે ઊભા રહેવાથી પ્રતિ મિનિટ બે કેલરી બળે છે. એક કલાક બેસવા કરતાં એક કલાક ઊભા રહેવાથી અઠવાડિયામાં ૪૨૦ કેલરી વપરાય છે. જો તમે કામકાજના દિવસમાં બે કલાક ઊભા રહો તો એક વર્ષમાં ૧૫ મેરાથોન દોડ્યા બરાબર કેલરી બળે. ઊભા રહેવા માટે કોઈ ફેન્સી ડેસ્કની જરૂર નથી, ઓફિસમાં એવી જગ્યા શોધો જયાં સરળતાથી ઊભા રહી કામ કરી શકાય.

કૂતરૃં કે બિલાડી પાળો : ડો. ગ્રેના મતે, 'બિલાડી રાખવાથી માનસિક સ્વાસ્થ્ય જળવાઈ રહે છે પરંતુ કૂતરું પાળવાથી શારીરિક અને માનસિક બંને સ્વાસ્થ્ય સારા રહે છે. વજન પણ નિયંત્રિત થાય છે. કૂતરા સાથે ચાલવા જવાથી કસરત પણ થઈ જશે અને મૂડ ફ્રેશ થશે.'

ધૂમ્રપાન કરો છો? : ધૂમ્રપાન છોડો, અઢળક લાભ થશે. આયુષ્ય લાંબુ થશે કારણકે સ્મોકિંગ કરતાં લોકો પોતાના આયખા કરતાં અડધી ઉંમરે જ મૃત્યુ પામે છે. ધૂમ્રપાન છોડવાથી ઊર્જા વધશે (૨-૧૨ અઠવાડિયામાં શરીરમાં બ્લડ સકર્યુલેશન વ્યવસ્થિત થશે). સ્કીનને પોષકતત્વો મળવાથી જવાન દેખાશો. દાંત સફેદ મોતી જેવા ચમકશે. સ્વાદ અને ગંધ વધુ સારી રીતે પારખી શકશો. સેકસ લાઈફ વધુ સારી બનશે.

ઊંઘવાની સારી આદતો જીવનની ગુણવત્તા અને સ્વાસ્થ્ય પર સકારાત્મક અસર કરે છે. સ્ટ્રેસ ઘટશે અને વધુ સારી ઊંઘ આવશો તો બીજા દિવસે શરીર વધુ ઉર્જાવાન હશે. સારી ઊંઘ માટે આટલું કરોઃ

ઊંઘવા માટે વાતાવરણ ઊભું કરો : બહુ ગરમી કે ઠંડી નહીં. કાનમાં રૂ ભરાવો અથવા હળવું સંગીત સાંભળો જેથી આસપાસના અવાજો ન સંભળાય. ઊંઘવા જવાના થોડા કલાકો પહેલા ઘરમાં ઓછું અજવાળું આપતી લાઈટ ચાલુ કરો. જેનાથી તમારા મગજને મેલાટોનિન (ઊંઘ લાવતું હોર્મોન) ઉત્પન્ન કરવાના સંકેત મળશે. ઊંઘવા જવાના કલાક પહેલા મોબાઈલ, ટીવી, લેપટોપથી દૂર રહો.

સમયસર ઊંઘવાની ટેવ પાડો : ઊંઘવા અને ઉઠવાના ટાઈમ નક્કી કરો. કામ, ડેડલાઈન અને ચર્ચાઓ વિશે ભૂલી જાઓ. ઊંઘતા પહેલા પુસ્તક વાંચો, હળવું સંગીત સાંભળો અથવા સ્નાન કરી લો.

આટલું ન કરો : ભારે અથવા બહુ તીખો તળેલો ખોરાક ન ખાઓ, દારુ કે સિગરેટ ન પીવો, કોઈ એવો ટીવી શો ન જુઓ કે જેથી તમે દુઃખી થાઓ અથવા ગુસ્સો આવે.

(10:21 am IST)