Gujarati News

નવી દિલ્હી,તા.૧૦: દુનિયાનો દરેક દેશ પ્રગતિ કરવા માંગે છે, વિકાસ તરફ આગળ વધવા માંગે છે, પરંતુ પ્રગતિનો માર્ગ ખૂબ મુશ્કેલ છે. કેટલીક વાર વહીવટીતંત્રે દેશના ભલા માટે એવી બાબતો પર પ્રતિબંધ મૂકવો પડે છે જે અન્ય દેશો માટે સામાન્ય હોઈ શકે છે. સિંગાપોર એવો જ એક દેશ છે જેણે વિકાસ માટે વિચિત્ર નિયમો બનાવ્યા છે જે દરેકને આંચકો લગાવે છે. આમાંનો એક નિયમ ચ્યુઇંગમ પર પ્રતિબંધ છે.

સિંગાપોર આજે ખૂબ સમૃદ્ઘ દેશ છે. તેની પાછળનું સૌથી મોટું કારણ અહીંના લોકોનું શિસ્ત છે. હકીકતમાં, દેશના પ્રથમ વડા પ્રધાન લી કુઆન યુ ઇચ્છતા હતા કે તેઓ ટૂંક સમયમાં તેનો વિકાસ કરે. તેમના મતે વિકાસમાં સૌથી મોટો અવરોધ લોકોની અનુશાસનહીનતા હોઈ શકે છે. આ કારણસર લીએ ઘણા પ્રતિબંધ લગાવ્યા હતા જેમાનો એક ચ્યુઇંગમ બેન હતો.

સિંગાપોરવાસીઓ સ્વચ્છતા રાખવા માંગતા હતા. ચ્યુઇંગમ ખાનારાઓ ઘણીવાર ઘણી ગંદકી ફેલાવે છે. તેઓ અહીં ત્યાં ગમે તેમ ફેંકે છે, જે કેટલીક વાર ટ્રેનોમાં, સીટની નીચે, શાળાઓમાં, નદીઓ અને ગટરોમાં પડેલી જોવા મળે છે. કેટલીક વાર તે ડ્રેનેજ સિસ્ટમને પણ ચોક કરી દે છે. ચ્યુઇંગમને કારણે દેશની સફાઈમાં ઘણી મુશ્કેલીઓ પડી રહી હતી તેથી અહીં ચ્યુઇંગમ પર પ્રતિબંધ મૂકવામાં આવ્યો હતો. ૧૯૯૨થી ચ્યુઇંગમ પર પ્રતિબંધ મૂકવામાં આવ્યો હતો.

૨૦૦૪માં અમેરિકા અને સિંગાપોર વચ્ચે મુકત વેપાર સમજૂતી બાદ દેશમાં આરોગ્ય સંબંધિત ચ્યુઇંગમ (ચ્યુઇંગમ વિથ હેલ્થ બેનિફિટ્સ) ખાવા પરનો પ્રતિબંધ હટાવી લેવામાં આવ્યો હતો. જોકે, આવી ચ્યુઇંગમ ખાવા માટે ડોકટરનું પ્રિસ્ક્રિપ્શન હોવું જરૂરી છે. આ ઉપરાંત અહીં અને ત્યાં ગમ થૂંકવા બદલ ભારે દંડ પણ થાય છે.

પ્રથમ કિસ્સામાં ૭૪,૦૦૦ રૂપિયા સુધીનો દંડ ફટકારી શકાય છે, પરંતુ બીજી વખત તે ગેરકાયદેસર રીતે ચ્યુઇંગમ ખાતા અથવા તેની આસપાસ ફેંકતા પકડાયા તો તેને ૧ લાખથી વધુનો દંડ અને ૨ વર્ષની જેલની સજા થઈ શકે છે.