Gujarati News

ઇસ્લામાબાદ તા. ૯ : કોઇપણ દેશમાં જાહેર સંપત્તિનો દુરોપયોગ કરતાં કર્મચારીઓને સરકાર આકરી સજા જ ફટકારે છે. આવુ જ બન્યું છે કે પાકિસ્તાન રેલવેના ડ્રાઇવર અને આસિસ્ટન્ટ ડ્રાઇવર સાથે. પાકિસ્તાન રેલવેના ડ્રાઈવરે દહીં ખરીદવા માટે ટ્રેનને સ્ટેશન પહેલા અધવચ્ચે જ ઊભી કરી દીધી હતી. જે પછી રેલવે વિભાગે કડક કાર્યવાહી કરતાં ટ્રેનના ડ્રાઈવર અને આસિસ્ટન્ટ ડ્રાઇવરને સસ્પેન્ડ કરી દીધા છે.

એક મીડિયા રિપોર્ટ મુજબ, પાકિસ્તાન રેલવે વિભાગે અહીંના કાહના રેલવે સ્ટેશન પાસે દહીં લેવા માટે અધવચ્ચે ટ્રેન ઊભી કરનારા ડ્રાઈવર અને એના આસિસ્ટ્ન્ટને સસ્પેન્ડ કર્યા છે. પાકિસ્તાન રેલવે મંત્રીએ સોશિયલ મીડિયા પર વાયરલ થયેલા વીડિયોને આધારે આ કાર્યવાહી કરી હતી, જેમાં ટ્રેનનો ડ્રાઇવર એક દુકાનેથી દહીં ખરીદતા અને ટ્રેન ઊભી રાખતાં જોવા મળે છે.

પાકિસ્તાનની નબળી આર્થિક સ્થિતિ વચ્ચે સરકારી સંપત્તિનો દુરોપયોગ કરતો આ વીડિયો સામે આવ્યા પછી રેલવે મંત્રાલયની ભારે ટીકા કરવામાં આવી રહી હતી. અંતે પરિસ્થિતિ એવી આવી પડી કે રેલવે મંત્રાલયે કાર્યવાહી કરતાં ટ્રેનના ડ્રાઈવર અને એના સહાયકને સસ્પેન્ડ કરવા પડ્યા.

પાકિસ્તાનના રેલવે મંત્રીએ આ કાર્યવાહીની સાથે ચેતવણી પણ આપી હતી કે, ભવિષ્યમાં આ પ્રકારની ઘટનાઓને સહન કરવામાં નહીં આવે અને કોઇને પણ ખાનગી કામ માટે જાહેર સંપત્તિનો ઉપયોગ કરવાની મંજૂરી નહીં મળે. આ અંગે સામે આવેલા રિપોર્ટમાં એવો દાવો કરવામાં આવ્યો છે કે, પાકિસ્તાન રેલવેએ યાત્રા દરમિયાન લોકોમોટિવ ડ્રાઈવર અને આસિસ્ટન્ટ દ્વારા મોબાઈલનો ઉપયોગ કરવા પર પ્રતિબંધ લગાવી દીધો છે. તેઓેને યાત્રા દરમિયાન ફોન દ્વારા સેલ્ફી લેવા, વીડિયો અને ઓડિયો મેસેજ મોકલવા પર પ્રતિબંધ લગાવી દેવામાં આવ્યો છે.