Gujarati News

નવી દિલ્હી: ઓનલાઈન વેચાણમાં પ્રભુત્વ ધરાવતી કદાવર કંપની એમેઝોને ડિલિવરી માટે 11 નવા વિમાનો ખરીદવાનું નક્કી કર્યું છે. એમેઝોને રોજ રોજ કરોડો પાર્સલ ડિલિવર કરવાના હોય છે. એ માટે નાના-મોટા અનેક પ્રકારના વાહનોની જરૂર પડે છે. એમેઝોન અત્યારે અન્ય એરક્રાફ્ટ કંપનીના વિમાનો વાપરે જ છે. એ કાફલામાં એમેઝોન પાસે 74 વિમાનો તો છે જ. આ અગિયાર પૈકી કંપની સાત વિમાન ડેલ્ટા એરલાઈન્સ પાસેથી જ્યારે બાકીના ચાર વેસ્ટજેટ પાસેથી ખરીદશે. આ અગિયાર વિમાનો બોઈંગના જ બનાવેલા છે. આ વિમાનો દ્વારા એમેઝોન પોતાનું કાર્ગો નેટવર્ક વિસ્તારશે. એમેઝોને એર ડિલિવરી માટે અલગ એમેઝોન ગ્લોબલ એર નામની પેટા કંપની સ્થાપી દીધી છે. અત્યારે એમેઝોન અમુક એરલાઈન્સ કંપનીઓ સાથે ભાગીદારી ધરાવે છે, એ ચાલુ જ રહેશે. એમેઝોને કહ્યુ હતુ કે અમારે ઝડપથી અને જથ્થાબંધ ડિલિવરી પહોંચાડવાની હોવાથી વિમાનો અનિવાર્ય છે.