Gujarati News

ન્યુયોર્ક તા.૨ : અમેરિકાની સાઉથ વેસ્ટ એરલાઇન્સે પોતાના એક યાત્રીની ૬ વર્ષની દીકરીને વિચિત્ર કારણથી ફ્લાઇટમાં ચડતાં અટકાવ્યાં હતાં. તમને જાણીને આશ્યર્ય થશે કે સાઉથવેસ્ટ એરલાઇન્સે ૬ વર્ષની બાળકીને કથિત રીતે એ કારણે ફ્લાઇટમાં ચડતાં અટકાવી કારણકે તેના વાળમાં જૂ હતી.

ડેઇલી મેઇલના એક ન્યૂઝ અનુસાર આ વિચિત્ર મામલો શિકાગોના રહેવાસી જે.ન્યૂમન અને તેની ફેમિલી સાથે થયો હતો. જયારે તે શિકાગોથી કેલિફોર્નિયા જનારી ફ્લાઇટની રાહ જોઇ રહ્યાં હતાં. તેઓ પોતાની રજા ગાળવા માટે ડિઝનીલેન્ડ જઇ રહ્યાં હતાં. આ દરમિયાન તેની પત્નીને દીકરીના વાળમાં કશું સફેદ દેખાયું. જે તેણે હાથથી દૂર કર્યું હતું. અડધો કલાક પછી એરલાઇન્સનો એક કર્મચારી તેની પાસે આવ્યો અને કહ્યું કે કેટલાક યાત્રીઓને ચિંતા છે કે તેની દીકરીના વાળમાં જૂ છે.

જયારે ન્યૂમને આ સાંભળ્યું ત્યારે તેણે કર્મચારીને પૂછ્યું કે તે મજાક તો નથી કરી રહ્યો ને? આ સાથે જ તેણે સમજાવ્યું કે તેની દીકરીના વાળમાં કોઇ સમસ્યા નથી પરંતુ તેને ફ્લાઇટમાં એન્ટ્રી ન આપી અને નેકસ્ટ ફ્લાઇટ ૨ દિવસ પછી હતી.

આ ઘટના પછી ન્યૂમનનું કહેવું છે કે તેની દીકરી આ ઘટનાથી ખૂબ જ દુખી છે. કારણકે તેને એવું લાગી રહ્યું છે કે તેની ભૂલ છે. સાઉથવેસ્ટ એરલાઇન્સે આવી કોઇ ઘટના બની હોવાનો ઇન્કાર કર્યો છે. તેમજ કહ્યું છે કે અમે અન્ય યાત્રીઓને તકલીફ આપવા ઇચ્છતા નહોતા. અનેક મુસાફરોએ આ વાતને લઇને ચિંતા વ્યકત કરી હતી. ન્યૂમન અને તેના પરિવારનો દાવો છે કે કંપની તરફથી તેને અત્યાર સુધીમાં કોઇ વળતર આપવામાં આવ્યું નથી.