મુંબઇ હોટેલની આગમાં અમદાવાદની CA યશા ઠક્કરનું પણ મોત

અમદાવાદના પ્રતિષ્ઠિત જૈન પરિવારની દીકરી યશા થર્ટી ફર્સ્ટ મનાવવા મુંબઇ ગઇ હતી

મુંબઇ તા. ૩૦ : મુંબઈની કમલા મીલ કમ્પાઉન્ડમાં આવેલી હોટલમાં લાગેલી આગમાં માર્યા ગયેલા ૧૪ કમનસીબ મૃતકોમાં અમદાવાદની ચાર્ટર્ડ એકાઉન્ટન્ટ યુવતી યશા આલાપ ઠક્કરનું પણ મોત નિપજયું છે. અમદાવાદના પ્રતિષ્ઠિત જૈન પરિવારની દીકરી યશા પોતાની પિતરાઈ બહેન અને તેના મિત્રો સાથે આ હોટલમાં ડીનર માટે ગઈ હતી.
પ્રાપ્ત વિગતો અકિલા અનુસાર, યશા આલાપ ઠક્કર બે દિવસ પહેલા જ થર્ટી ફર્સ્ટ મનાવવા માટે મુંબઈ ગઈ હતી. અહીં તેના ફોઈ સંગીતાબહેન રહે છે અને તેમની દીકરી સ્વીટી અને તેના મિત્રો સાથે યશા ગઇરાત્રે ડીનર માટે લોઅર પરેલના કમલા મીલ કમ્પાઉન્ડમાં આવેલી આ હોટલમાં ગઈ હતી. રાત્રે સાડા બાર વાગ્યાની આસપાસ આ હોટલના રૂફટોપ પબમાં ખૂશ્બુ મહેતા નામની યુવતીની બર્થડે પાર્ટી ચાલી રહી હતી. તે દરમિયાન જ હોટલની છત ઉપર આગ લાગી હતી. નાસભાગ મચી જતાં યશા અને તેની પિતરાઈ બહેન સહિતના લોકો બચવા માટે દોડ્યા હતા, પરંતુ તે સમયે જ આખો સ્લેબ તૂટી પડતાં આ લોકો ફસાઈ ગયા હતા અને ગુંગળામણના કારણે યશાનું મૃત્યુ થયું હતું.
ચાર્ટર્ડ એકાઉન્ટન્ટનો અભ્યાસ પૂર્ણ કરી ચૂકેલા યશા બુધવારે જ મુંબઈ ગઈ હતી. જયારે તેના પતિ અને ચાર્ટર્ડ એકાઉન્ટન્ટના છેલ્લા તબક્કાનો અભ્યાસ કરતા આલાપ ઠક્કર આજે મુંબઈ જવાના હતા. થોડા સમય પહેલા જ બંનેના લગ્ન થયા હતા.
ઇસ્કોન આંબલી રોડ પર આવેલા જયંતીલાલ પાર્કની સામેના દેવકુટીર-૨માં રહેતા યશાના પરિવારજનો ઘટનાની જાણ થતાં જ મુંબઈ દોડી ગયા હોવાનું જાણવા મળ્યું છે. યશાના પિતા રૂપેશ સેવંતીલાલ શાહ અને રૂપલબહેન અમદાવાદના જૈન પરિવારોમાં જાણીતું નામ છે.