ગાંધીનગર નજીક ચિલોડામાં રાત્રીના સમયે અગાઉના ઝઘડાની અદાવતમાં યુવાન પર જીવલેણ હુમલો કરી મોતનેઘાટ ઉતારી દેતા અરેરાટી

ગાંધીનગર:શહેર નજીક આવેલા ચિલોડા ગામમાં ગઈકાલે રાત્રીના સમયે અગાઉની તકરારની અદાવત રાખી મિત્રએ જ મિત્ર એવા યુવાનના માથામાં ધોકા મારીને ગંભીર ઈજાઓ પહોંચાડી હતી અને આ યુવાનના પરિવારજનો તેને ઘરે લઈ ગયા તે દરમ્યાન તેનું મોત નીપજયું હતું. આ ઘટના અંગે ચિલોડા પોલીસને જાણ કરવામાં આવતાં પોલીસે યુવાન સામે હત્યાનો ગુનો નોંધી તેની ધરપકડ માટે દોડધામ શરૂ કરી છે. 

આ ઘટના અંગે ચિલોડા પોલીસ સ્ટેશનમાંથી મળતી વિગતો પ્રમાણે ચિલોડાના મોટા પંચવટીવાસમાં રહેતાં મુકેશ માંગીલાલ મારવાડીના મોટાભાઈ સુરેશભાઈ અને તેમનો ગામમાં જ રહેતો મિત્ર લાલભાઈ ઈશ્વરભાઈ જાની ગાળાગાળી કરી ઘર સામે જ ઝગડો કરતાં હતા. પરંતુ મુકેશને એવું લાગ્યું હતું કે આ બન્ને મિત્રો છે અને મજાક કરી રહયા છે તેમ માનીને તે લગ્નમાં જતો રહયો હતો. વહેલી સવારે છ વાગ્યાના સુમારે તે  ગામમાંથી ઘરે પહોંચ્યો ત્યારે જોયું હતું કે રોડ સાઈડમાં તેનો ભાઈ સુરેશ લોહીથી લથપથ હાલતમાં જોયો હતો અને તે ડઘાઈ ગયો હતો.