કલોલ નજીક ધેધુ ગામની સીમમાં પોલીસે બાતમીના આધારે દરોડા પાડી જુગાર રમતા ચાર શખ્સોને 11 હજારની રોકડ સાથે ઝડપી લીધા

કલોલ:ધેધુ ગામની સોજા ગામ તરફ જતા રોડની પાસે આવેલા બોરકુવા પાસે કલોલ તાલુકા પોલીસે દરોડો કરી જુગાર રમતા ચાર શખ્સોને ૧૧ હજાર ઉપરાંતની રોકડ રકમ સાથે ઝડપી લીધા હતા. પોલીસે જુગારનો કેસ દાખલ કરી વધુ તપાસ હાથ ધરી છે.

કલોલ અને ગ્રામ્ય વિસ્તારમાં હવે શ્રાવણિયો જુગાર જામ્યો છે. ત્યારે પોલીસ પણ જુગારીઓને પકડી પાડવા દોડધામ કરી રહી છે. કલોલ તાલુકા પોલીસ મથકના પીએસઆઇ વાય.ડી.ગામીત તથા એ.એસ.આઇ ધવલભાઇ, હેડ કોન્સ્ટેબલ નરેશભાઇ, કોન્સ્ટેબલ મહેન્દ્રસિંહ, શૈલેષભાઇ, અમિતભાઇ , એલ.આર. રોનકભાઇ, કુલદીપભાઇ સહિતનો સ્ટાફ પેટ્રોલીંગમાં હતો તે વખતે ધેધુથી સોજા તરફ જતા રોડની પાસે ગામની સીમમાં આવેલા બોરકુવા નજીક આંબલીના ઝાડ નીચે જુગાર રમાતો હોવાની બાતમીને આધારે પોલીસે દરોડો કર્યો હતો. 

જેમાં જુગાર રમતા મુકેશજી બલાજી ઠાકોર રહે.કરણનગર, કડી, જીતેન્દ્ર શંકરલાલ કડિયા રહે.સોજા ગામ.હરેશજી અમરત જી ઠાકોર રહે.ધેધુ ગામ, પ્રભાત જી સકાજી ઠાકોર રહે. ધેધુ ગામને પોલીસે રંગેહાથે ઝડપી લીધા હતા. પોલીસે સ્થળ પરથી રૂપિયા ૧૧,૭૦૦ની રોકડ રકમ કબ્જે લઇ જુગારી સામે કાર્યવાહી કરી હતી.