સુરતના અમરોલી વિસ્તારમાં પાનનો ગલ્લો ખોલવા બાબતે થયેલ ઝઘડામાં સામસામે ચપ્પુના ઘા જીકાતા ત્રણ શખ્સો ગંભીર રીતે ઈજાગ્રસ્ત
સુરત: શહેરના અમરોલીમાં બુધવારે રાત્રે પાનનો ગલ્લો ખોલવાના મુદ્દે થયેલા ઝઘડામાં સામસામે ચપ્પુના ઘા મારતા ત્રણ વ્યક્તિ ઘાયલ થતા સારવાર માટે નવી સિવિલ હોસ્પિટલમાં દાખલ કર્યા છે. જોકે આ બનાવમાં સામસામે હત્યાનો પ્રયાસ કરવાનો ગુનો નોંધાયો છે.
નવી સિવિલ હોસ્પિટલથી મળેલી વિગત મુજબ અમરોલીના કોસાડ ખાતે એસએમસી આવાસમાં રહેતા 41 વર્ષીય ફિરોઝ ખાન જબ્બર ખાન પઠાણ અને ત્યાંજ રહેતો તેનો મિત્ર શાહરૂખ અનીશ અન્સારી (ઉ- વ- 25) બુધવારે રાત્રે કોસાડ આવાસમાં બિલ્ડીંગ નંબર 72 પાસે નરેશ કોળી સાથે ઝઘડો થયો હતો.
બાદમાં સામસામે થયેલી મારામારીમાં એકબીજાને ચપ્પુના ઘા મારી ઇજા પહોંચાડી હતી. જેમાં ત્રણેમાં ફિરોઝ ખાનની બંને પગમાં ઇજા થઇ તથા શાહરૂખને પેટના ભાગે અને બંને હાથમાં અને નરેશને માથાના ભાગે ઈજા થઈ હોવાથી સારવાર માટે નવી સિવિલ હોસ્પિટલમાં દાખલ કર્યા છે.