વડોદરાના હરણી રોડ વિસ્તારમાં ભર બપોરે બાઈક પર જતી મહિલાના ગળામાંથી અછોડો તોડી બાઇકસવાર લૂંટારુ ફરાર
વડોદરા: શહેરના હરણી રોડ વિસ્તારમાં સ્કૂટર પર બેસીને જતી મહિલાના ગળામાંથી સોનાનો અછોડો તોડીને બાઇકસવાર લૂંટારાઓ ભાગી છૂટયા હતા.મહિલાએ બૂમાબૂમ કરી આરોપીઓનો પીછો પણ કર્યો હતો.પરંતુ,આરોપીઓ ભાગી છૂટવામાં સફળ થયા હતા.
હરણી રોડની સ્વામિ નારાયણ નગર સોસાયટીમાં રહેતા ૫૮ વર્ષના રમાબેન ભગવતીભાઇ પટેલ ઘરકામ કરે છે.તેમના પતિ નિવૃત્ત જીવન ગુજારે છે.આજે સવારે રમાબેન પુત્રવધૂ સાથે ઇશ્વર શાંતિ સોસાયટીમાં રહેતા દિયરના ઘરે મળવા માટે સ્કૂટર પર ગયા હતા.સ્કૂટર તેમની પુત્રવધૂ ચલાવતી હતી.તેઓને મળીને ઘરે પરત આવતા સમયે હીરાનગર સોસાયટીના નાકા પાસે બાઇક પર આવેલા બે લૂંટારાએા પૈકી પાછળ બેસેલા લૂંટારાએ તેમના ગળામાંથી અછોડો તોડી લીધો હતો.રમાબેને બૂમાબૂમ કરી હતી.પરંતુ,બાઇક સવાર લૂંટારાઓ ભાગી છૂટવામાં સફળ થયા હતા.બંને આરોપી શરીરે જાડા હતા.અને મોઢા પર સફેદ રૃમાલ બાંધ્યો હતો.અને કાળા રંગની ટી-શર્ટ પહેરી હતી.
બાઇકસવાર લૂંટારાઓ એ રમાબેનના ગળામાંથી અઢી ગ્રામનો અછોડો તોડયો હતો.પરંતુ,માત્ર સાત ગ્રામનો અછોડો જ તેઓના હાથમાં આવ્યો હતો.જ્યારે બાકીનો અછોડો તેમના ડ્રેસમાં ભરાઇ જતા બચી ગયો હતો. પોલીસે બનાવ અંગે ગુનો દાખલ કરી સીસીટીવી ફૂટેજના આધારે આરોપીઓની શોધખોળ હાથ ધરી હતી.