ગુજરાત
News of Saturday, 24th July 2021

ભરૂચના આમોલ નજીકના રોઢ ગામ પાસે બાઇક અને ટ્રક વચ્‍ચે ટક્કરઃ ઘમણાંદ ગામના પિતા-પુત્ર પૌત્રના મોતથી અરેરાટી

એક જ પરિવારના ત્રણ સભ્‍યોના મોતથી ઘેરો શોક

ભરૂચ: આમોદથી પાંચ કિલોમીટરના અંતરે આવેલ રોંઢ ગામ પાસે ગમખ્વાર અકસ્માત સર્જાયો હતો. જેમાં પિતા પુત્રનું ઘટના સ્થળેજ કમકમાટી ભર્યું મોત નિપજવા પામ્યું હતું. એક જ પરિવારના બે મોભીના મોતથી પરિવાર સહિત ગામમાં પણ શોકનું મોજું ફરી વળ્યું હતું. ઘમણાંદ ગામના રહેવાસી પિતા પુત્ર સહિત પૌત્ર આમ એક જ ઘરના ત્રણ વ્યક્તિઓ કોઈ કામસર બાઈક લઈને અમોદ ખાતે ગયા હતા જે અમોદથી ઘરે પરત ફરતી વેળાએ ગંભીર અકસ્માત સર્જાયો હતો.

બનાવ અંગે પ્રાપ્ત થતી માહિતી અનુસાર ઘમણાંદ ગામના એકજ પરિવારના 3 સભ્યો બાઈક ઉપર સવાર થઈ આમોદથી પોતાના ઘરે પરત ફરી રહ્યા હતા. તે વેળાએ રોંઢ ગામ નજીક ટ્રક ચાલકે અડફેટે લેતા અકસ્માત સર્જાયો હતો.

અકસ્માતને પગલે પિતા-પુત્રના ઘટના સ્થળેજ કમકમાટી ભર્યા મોત નિપજ્યા હતા. તેમજ અન્ય એકને ગંભીર ઇજાઓ પહોંચતા તેને 108 મારફતે આમોદ સામુહિક આરોગ્ય કેન્દ્ર ખાતે સારવાર અર્થે ખસેડાયો હતો. બનાવને પગલે લોક ટોળા પણ ઉમટી પડ્યા હતા.

તેમજ ઘટનાની જાણ થતાં જ આમોદ પોલીસનો કાફલો પણ દોડી આવ્યો હતો. પોલીસે મૃતકનો કબજો મેળવી PM અર્થે ખસેડવાની તજવીજ હાથ ધરી હતી. એકજ પરિવારના બંને મોભી ગુમાવનાર પરિવાર જનોમાં ભારે અરેરાટી વ્યાપી જવા પામી હતી તેમજ ઘમણાંદ ગામમાં પણ શોકનો માહોલ છવાયો હતો.

(4:14 pm IST)