ખંભાત તાલુકાના રોહિણીમાં રાત્રીના સુમારે કારે બાઇકને હડફેટે લેતા પિતા-પુત્ર ગંભીર રીતે ઈજાગ્રસ્ત

ખંભાત: તાલુકાના રોહિણી ગામે રહેતા મહેન્દ્રસિંહ અમરસિંહ પરમાર ગત ૧૮મી તારીખના રોજ રાત્રીના સુમારે પોતાના બાઈક નંબર જીજે-૨૩, એપી-૩૧૦૯ ઉપર પોતાના પુત્ર રાજવીર (ઉ. વ. ૧૫)ને બેસાડીને ખેતરે આંટો મારવા માટે નીકળ્યા હતા.

રાત્રીના સાડા નવેક વાગ્યાના સુમારે રોહિણી-ખાખસર રોડ ઉપર આવેલા પેટ્રોલપંપ પાસેથી પસાર થતા હતા ત્યારે પાછળથી પુરપાટ ઝડપે આવી ચઢેલી કારે બાઈકને પાછળથી ટક્કર મારતાં પિતા-પુત્ર રોડ ઉપર પટકાયા હતા. અકસ્માત સર્જીને થોડે દૂર જઈ કાર ચાલક ઊભો રહ્યો હતો અને નીચે ઉતર્યો હતો. મહેન્દ્રસિંહે જોતાં જ તે તારાપુર ખાતે રહેતો વિક્રમસિહ રાઓલજી હોવાનું ખુલવા પામ્યું હતુ. જો કે કારચાલક તુરંત જ કારમાં બેસીને ત્યાંથી ફરાર થઈ ગયો હતો.