ગુજરાત
News of Saturday, 20th October 2018

મ્યુનિસિપલ સ્વિમિંગપૂલના ખાનગીકરણ વિરૂદ્ધ આક્રોશ

સભ્યોએ વિવિધ બેનરો સાથે ઉગ્ર દેખાવો કર્યા : કોંગ્રેસની સમગ્ર મામલાનો ઉગ્ર વિરોધ કરી શહેરીજનોને ખાસ રાહત આપવા માંગણી : તિજોરીને કરોડોનું નુકસાન

અમદાવાદ, તા.૨૦ :  એએમટીએસને ખાનગીકરણ તરફ લઇ જઇને મ્યુનિસિપલ શાસકોએ સમગ્ર સંસ્થાને વધુ ને વધુ દેવાની ગર્તામાં ધકેલી દીધી છે. એક અંદાજ મુજબ પ્રાઇવેટ ઓપરેટરોનાં રવાડે ચડીને પેસેન્જરને તો કોઇ લાભ થયો નથી, પરંતુ મ્યુનિસિપલ તિજોરીને દરરોજ રૂ. એક કરોડની જંગી ખોટ જઇ રહી છે, તેમ છતાં મ્યુનિ. સ્વિમિંગપૂલમાં હવે ખાનગીકરણનો રસ્તો સત્તાધીશોએ પસંદ કર્યો છે., જેને લઇ ભારે વિવાદ અને આક્રોશ ફાટી નીકળ્યો છે. તો હવે કોંગ્રેસે પણ સમગ્ર મામલાનો ઉગ્ર વિરોધ કરી શહેરીજનોને રાહત આપવા માંગણી કરી છે. શહેરના વિવિધ સ્વિમિંગપૂલનાં સંચાલનમાં ખોટ થતી હોઇ સત્તાવાળાઓએ તેના દરમાં સો ગણો વધારો કર્યો હોઇ હવે તો ખોટનું કારણ રહેતું નથી. તેમ છતાં પાછલા બારણેથી મળતિયા કોન્ટ્રાકટરોને આર્થિક બખ્ખા કરાવવા માટે ખાનગીકરણ થઇ રહ્યું હોઇ લોકોમાં સ્વયંભૂ ભારે રોષ ફાટી નીકળ્યો છે. આજે સવારથી વિવિધ સ્વિમિંગપૂલ ખાતે મોટી સંખ્યામાં સભ્યો બેનર લઇને વિરોધ દર્શાવતાં જોવા મળ્યા હતા. શહેરમાં મ્યુનિસિપલ સંચાલિત ૧૪ સ્વિમિંગપૂલ અને ભવિષ્યમાં બનનારાં સ્વિમિંગપૂલના ખાનગીકરણની તંત્રની દરખાસ્તને ભાજપના શાસકોએ લીલીઝંડી આપી દઇને ભારે વિવાદના વમળ ઊભા કર્યા છે. સ્ટેન્ડિંગ કમિટીની બેઠક અગાઉની એજન્ડાની બેઠકમાં સ્વિમિંગપૂલની ફીમાં ઝીંકાયેલા બેફામ વધારાની દરખાસ્ત અને ખાનગીકરણની દરખાસ્તને ખુદ મ્યુનિસિપલ ભાજપનાં ટોચનાં હોદ્દેદારોએ વિરોધના સૂર વ્યક્ત કર્યા હતાં. એક હોદ્દેદારે તો ચાલુ બેઠકમાં ઊભા થઇને મ્યુનિ. ભાજપના પ્રભારીને ચોખ્ખા શબ્દોમાં સંભળાવ્યું હતું કે, સાહેબ આવું ન ચાલે. બે-ચાર સ્ટેન્ડિંગ કમિટીનાં સભ્યોએ પણ તંત્રની આ બંને દરખાસ્તને ફગાવી દેવાની ભારપૂર્વક રજૂઆત કરી હતી. જો કે સ્ટેન્ડિંગ કમિટીની એજન્ડા બેઠકમાં આ પાર્ટીનો નિર્ણય હોઇ તેમાં કોઇ ફેરફાર થઇ શકે નહીં તેવો નિર્ણય લેવાતા વિરોધી સૂર આપોઆપ શિસ્તના નામે ઠંડો પડ્યો હતો. મ્યુનિસિપલ શાસકોએ સ્વિમિંગપૂલના સંચાલન પાછળ રૂ.૬.પ૦ કરોડનો ખર્ચ થતો હોઇ તેની સામે આવક રૂ.૩.પ૦ કરોડ દર્શાવીને આ ખોટને સરભર કરવા વાર્ષિક રૂ.૧૮૦૦ની ફીમાં ૧૦૦ ટકા વધારો સૂચવતી તંત્રની રૂ.૩૬૦૦ની સભ્ય ફીની દરખાસ્તને મંજૂરી આપી હતી. જો કે આ મંજૂરીથી આપોઆપ સ્વિમિંગપૂલનાં ખોટનો પ્રશ્ન ઉકેલાઇ જતો હોવા છતાં પણ કેટલાક મળતિયા કોન્ટ્રાકટરોને પાછલાં બારણેથી આર્થિક લાભ અપાવવા ખાનગીકરણની દરખાસ્તને લીલીઝંડી આપી હતી. સત્તાધીશો દ્વારા તંત્રની ખાનગીકરણની દરખાસ્તમાં લોકોની આંખમાં ધૂળ નાખવા મામુલી એવા બે સુધારા કરાયાં છે. જેમાં જે તે કોન્ટ્રાકટરને પાંચ વર્ષનાં બદલે ત્રણ વર્ષ માટે સ્વિમિંગપૂલનો કોન્ટ્રાકટ અપાશે તેમજ તમામ સત્તા કમિશનરને બદલે હવે સ્ટેન્ડિંગ કમિટી પાસે રહેશે. જો કે,ખાનગીકરણ મામલે ભાજપના શાસકાએ બચાવ કર્યો કે, હાલમાં મ્યુનિસિપલ સ્વિમિંગપૂલમાં કોઇ આંતરરાષ્ટ્રીય સ્તરનાં તરવૈયા તૈયાર થતા નથી.

ખાનગીકરણ કરવાથી આંતરરાષ્ટ્રીય સ્તરના તરવૈયા તૈયાર કરી શકાશે. જાણકાર સૂત્રોના મતે, સ્વિમિંગપૂલમાં ખાનગીકરણ અપનાવીને પ્રજાની માલિકીના કરોડોના ખર્ચે તૈયાર થયેલા આ સ્વિમિંગપૂલ મળતિયા કોન્ટ્રાકટરને પધરાવવાનો મનસૂબો ધરાવતા હોવાનું સામાન્ય લોકોમાં પણ ચર્ચાઇ રહ્યું છે. જેના કારણે આજે સવારથી વિવિધ સ્વિમિંગપૂલમાં લોકોએ ખાનગીકરણ સામે વિરોધ દર્શાવવા ઉગ્ર બેનરો સાથે દેખાવો યોજયા હતા.

દરમ્યાન આ અંગે સ્ટેન્ડિંગ કમિટીનાં ચેરમેન અમૂલ ભટ્ટને પૂછતા તેમણે કંઇ પણ કહેવાનો ઇન્કાર કર્યો હતો. દરમ્યાન સરદાર પટેલ સ્વિમિંગપૂલનાં સભ્ય જયેશ પટેલે જણાવ્યું કે, સ્વિમિંગપૂલનાં ખાનગીકરણ અને ફીમાં કરાયેલા બમણા વધારા સામે અમે ગઇકાલે મ્યુનિસિપલ કમિશનર વિજય નેહરા અને મેયર બીજલબહેન પટેલ સમક્ષ ઉગ્ર રજૂઆત કરી હતી. આજે સવારે પણ સ્વિમિંગપૂલની અંદર અને બહાર મોટી સંખ્યામાં સભ્યો એકઠા થઇને દેખાવો કર્યા હતાં. સરદાર પટેલ સ્ટેડિયમનાં સ્વિમિંગપૂલમાં કુલ પાંચ હજારથી વધુ સભ્ય છે અને રૂ.૭પ લાખથી વધારાની જંગી એવી આવક છે. પરંતુ પ્રશ્ન સ્વિમિંગપૂલની આવકનો નથી અમારો વિરોધ સ્વિમિંગપૂલનાં વેપારીકરણ સામે છે. સ્વિમિંગપૂલને નફા-નુકસાનનાં ત્રાજવે તોળાય નહીં, કારણ કે તે પ્રજાની માલિકીનાં છે.

(7:37 pm IST)