જયારે, પોલીસ અને ફરીયાદીઓ બંન્ને પોલીસ કમિશ્નરની જાગૃતીથી આરોપી બન્યા
૪ પોલીસમેને કોલ સેન્ટર પર બનાવટી રેઇડ કરીઃ કોલ સેન્ટર સંચાલકો દ્વારા ફરીયાદ થઇઃ અનુપમસિંહ ગેહલોત ઉંડા ઉતર્યા અને બધાના ચહેરા પરથી 'મુખોટા' ઉતરી ગયા : લેપટોપમાં મેજીક જેક નામના ડીવાઇસ કે જે અમેરિકાનો નંબર દેખાડે છે તેની મદદથી લોનની લાલચ આપી વેરીફીકેશન અને લોન એગ્રીમેન્ટ ફી માંગી અમેરીકનો પાસેથી ડોલર પડાવવાના કૌભાંડનો વડોદરામાં પર્દાફાશ
રાજકોટ, તા, ૨૦: વડોદરાના અલ્કાપુરી વિસ્તારમાં ડુપ્લેક્ષ મકાનમાં બોગસ કોલ સેન્ટર ચલાવી અમેરીકન નાગરીકોના ડેટાની લીડ મેળવી લેપટોપમાં મેજીક જેક નામના ડીવાઇસ કે જે અમેરિકાનો નંબર દેખાડે છે તેની મદદથી લોનની લાલચ આપી વેરીફીકેશન અને લોન એગ્રીમેન્ટ ફી માંગી અમેરીકનો પાસેથી ડોલર પડાવવાના કૌભાંડનો વડોદરાના પોલીસ કમિશ્નર અનુપમસિંઘ ગેહલોતની જાગૃતીથી કઇ રીતે પર્દાફાશ થયો તેની વિગતો રસપ્રદ છે.
ઉકત કોલ સેન્ટર પર પોલીસ કમિશ્નર ઓફીસમાંથી આવતા હોવાની ઓળખ આપી કોલ સેન્ટરવાળાઓને તમે ગેરકાયદે ધંધા કરો છો? તેમ કહી પોલીસ યુનિફોર્મ સાથે રાજેશ, ફરાચ, રમેશ ફાવડે અને પ્રકાશ ચિતે નામના પોલીસે તોડ કરવા માટે રેઇડ કરી લાખો રૂપીયા ઘરભેગા કરી દીધા હતા.
આટલાથી સંતોષ ન થતા રાજેશ નામના પોલીસમેન દ્વારા વધુ ૧ર લાખની માંગણી થતાાકોલ સેન્ટરવાળાઓએ પાછળથી પૈસાની સગવડ કરી આપશું તેમ જણાવેલ.
દરમિયાન કોલ સેન્ટરવાળાઓને ચારેય પોલીસ દ્વારા થયેલી રેઇડ નકલી હોવાની શંકા જતા તેઓએ સંયાજીગંજ પોલીસમાં ફરીયાદ કરવા પહોંચ્યા હતા. દરમિયાન પોલીસ કમિશ્નરને આ અંેગે માહીતી મળતા તેઓએ તુર્ત જ કોલ સેન્ટરવાળા ફરીયાદીઓની પુપછપરછ કરતા ચોંકાવનારી બાબતો પ્રકાશમાં આવતા તેઓએ બનાવટી રેઇડ કરવા ગયેલા પોલીસમેનોની શોધખોળ ચલાવવા પોલીસ ટીમો કામેે લગાડેલ.
રેઇડ દરમિયાન રાજેશ દ્વારા જે નેઇમ પ્લેટ લગાડેલી અને રેઇડ દરમિયાન જે નામો લેવાતા હતા તે આધારે પોલીસ કમિશ્નર અનુપમસિંહ ગેહલોતે તપાસ કરતા જ પોલીસ હેડ કવાર્ટરમાં ફરજ બજાવતા આર્મ્સ પો.કોન્સ્ટેબલ રાજેશ સપકાલ શંકાના દાયરામાં આવેલ અને આખી બનાવટી રેઇડનો પર્દાફાશ થયેલ અને ગણત્રીના કલાકોમાં જ રાજેશ, ફરાજ અને પ્રકાશ ઉર્ફે જય સકંજામાં આવી ગયેલ.
દરમિયાન ફરીયાદીઓ પણ મોટા કારીગર હોવાનું અને કોલ સેન્ટર દ્વારા કૌભાંડ ચલાવી રહયાની હકીકત ખુલતા જ કોલ સેન્ટરના ભેજાભાજો મનીષ પ્રહલાદ, રવિ થાવર(વેરાવળ), સ્વાગત દિનેશચંંદ્ર (તરસાલી) અને અર્જુન શાહ ડભોઇ પણ સકંજામાં આવી ગયેલ. આમ પોલીસ કમિશ્નરની જાગૃતીને કારણે નકલી રેઇડ કરનારા પોલીસ તથા ફરીયાદીઓ પણ આ રીતે આરોપી બની ગયા હતા.