પરિણીતાની આબરુ લેવાનો પ્રયાસ કરનાર સોજીત્રાના યુવાન વિરુદ્ધ પોલીસ ફરિયાદ
સોજીત્રા:ખાતે રહેતી એક પરિણીતાની આબરૂ લેવાનો પ્રયાસ કરવામાં આવતા આ અંગે પરિણીતાએ પતિ સાથે સોજીત્રા પોલીસ મથકે આવીને પોતાની ફરિયાદ આપતાં પોલીસે ગુનો દાખલ કરીને તેને ઝડપી પાડવાના ચક્રો ગતિમાન કર્યા છે.
મળતી વિગતો અનુસાર ૩૧ વર્ષની પરિણીતાની બાજુમાં જ રહેતા ઈમરાન અબ્દુલભાઈ વ્હોરા દ્વારા પરિણીતા સાથે યેનકેન પ્રકારે વાતચીત કરવાનો તેમજ તેણી બહાર નીકળે તો પીછો કરાતો હતો જેથી તેના મલિન ઈરાદાને પામી ગયેલી પરિણીતાએ તેની સાથે વાત જ કરવાનું બંધ કરી દીધું હતુ. પરંતુ ગત ૧૬મી તારીખના રોજ પરિણીતા પોતાના સંતાનોને ટેલિફોન એક્સચેન્જ સામે આવેલી નિશાળે મુકવા માટે આવી હતી ત્યારે ઈમરાને તેણીનો હાથ પકડીને તમો ખુબસુરત છો, મને બહુ ગમો છો મારી સાથે સંબંધ રાખ તેમ જણાવીને જાતીય સતામણી કરી હતી. પરિણીતાએ હાથ છોડાવીને ઘર તરફ પ્રયાણ કરતા રસ્તામાં પાછળ-પાછળ આવેલા ઈમરાને પોતાની માંગણી ચાલુ જ રાખી હતી. જેથી ઘરે આવીને પોતાના પતિને વાત કરતાં આ અંગે ફરિયાદ આપી હતી.