ગળતેશ્વરના બલાઢામાં નજીવી બાબતે બે પાડોશી બાખડ્યા: સામસામે થયેલ મારામારીમાં બે મહિલા ઈજાગ્રસ્ત
ગળતેશ્વર: તાલુકાના બલાઢા ગામમાં આવેલ નવી નગરી વિસ્તારમાં રહેતાં લલીતાબેન રઈજીભાઈ ખાંટ ગત શુક્રવારના રોજ સવારના સમયે તેમના ઘર બહાર વાસણ માંજતાં હતાં. તે વખતે તેમના પાડોશમાં રહેતાં સુમિત્રાબેન બુધાભાઈ પરમાર ત્યાંથી પસાર થતી વખતે ગમેતેમ અપશબ્દો બોલતાં પસાર થતાં હતાં. જેથી વાસણ માંજતાં લલીતાબેને અપશબ્દો બોલવાની ના પાડતાં ઉશ્કેરાયેલા સુમિત્રાબેન પોતાના ઘરે જઈ પતિ બુધાભાઈ સોમાભાઈ પરમાર અને પુત્રી દક્ષાબેન બુધાભાઈ પરમારને બોલાવી પરત આવી લલીતાબેન સાથે ઝઘડો કર્યો હતો.
ઝઘડો ઉગ્ર બનતાં બુધાભાઈ પરમારે હાથમાંનો લાકડાનો ડંડો લલીતાબેનને માર્યો હતો. જેથી લલીતાબેન જમીન પર પડી ગયાં હતાં. તે વખતે સુમિત્રાબેન અને પુત્રી દક્ષાબેને ભેગા મળી લલીતાબેનને ગડદાપાટુનો માર માર્યો હતો. અને જાનથી મારી નાંખવાની ધમકીઓ આપી ત્રણેય જણાં ત્યાંથી જતાં રહ્યાં હતાં. આ અંગે પોલીસે ગુનો દાખલ કરીને તપાસ હાથ ધરી હતી.