ખંભાત તાલુકામાં હિટ એન્ડ રન:કારની હડફેટે મહિલાનું પ્રાણપંખેરું સારવાર દરમ્યાન ઉડ્યું
ખંભાત:તાલુકાના કલમસર-ધુવારણ રોડ ઉપર ગઈકાલે સાંજના સુમારે એક હીટ એન્ડ રનના બનાવમાં મહિલાનુ ંસારવાર દરમ્યાન મોત થયું હતુ. આ અંગે ખંભાત રૂરલ પોલીસે ગુનો દાખલ કરીને કાર્યવાહી હાથ ધરી છે.
મળતી વિગતો અનુસાર કલમસર ગામે રહેતા ફરિયાદી કનુભાઈ લક્ષ્મણભાઈ સીંઘાના બહેન દક્ષાબેન દિપુભા ઝાલા (ઉ. વ. ૪૦, રે. લીંબડી, સુરેન્દ્રનગર) સાસરીમાંથી બે દિવસ પહેલાં પુત્રી સાથે તેમના ઘરે આવ્યા હતા. ગઈકાલે સાંજના સુમારે જનકબેન સુરેશભાઈ સિંઘા સાથે ગામમાં લગ્નની ખરીદી કરવા માટે ગયા હતા. ત્યાંથી પરત ફરી રહ્યા હતા ત્યારે સાતેક વાગ્યાના સુમારે કલમસર-ધુવારણ રોડ ઉપર ખંભાત તરફથી પુરપાટ ઝડપે આવી ચઢેલી એક બ્લેક કલરની કારે ટક્કર મારતાં દક્ષાબેનને માથામાં તથા કમરના ભાગે ગંભીર ઈજાઓ થવા પામી હતી. ટક્કર માર્યા બાદ ગાડીનો ચાલક ત્યાંથી ગાડી લઈને ફરાર થઈ ગયો હતો. ગંભીર રીતે ઘવાયેલા દક્ષાબેનને રીક્ષામાં સારવાર માટે ખંભાતની જનરલ હોસ્પિટલમા ંલઈ જવામાં આવ્યા હતા.