ડીસાની ખાનગી હોસ્પિટલમાં પ્રસુતિ વેળાએ બે પુત્રીની માતાનું મોત તબીબની ભૂલના આક્ષેપ સાથે સ્થાનિકોએ રેલી કાઢી આપ્યું આવેદન

ડોક્ટરની ભૂલના કારણે મોત થયાના આક્ષેપ સાથે ઉગ્ર આક્રોશ સાથે રેલી યોજાઈ

ડીસાની ખાનગી હોસ્પિટલમાં કેટલાક દિવસ અગાઉ પ્રસુતિ દરમ્યાન બે બાળકીની માતાનું મોત થયુ હતુ. જેને લઇને સ્થાનિકોએ મોટી સંખ્યામાં રેલી કાઢી તંત્રને આવેદનપત્ર આપ્યુ હતુ. ડીસામાં ડોક્ટરની બેદરકારીથી મૃત્યુ થયાના મામલે પરિવારજનો શોકમાં ગરકાવ થઇ ગયા છે. બે પુત્રીની માતાનું ડોક્ટરની ભૂલના કારણે મોત થયાના આક્ષેપ સાથે આજે ઉગ્ર આક્રોશ સામે આવ્યો છે.

બનાસકાંઠા જીલ્લાના ડીસામાં આવેલી આનંદ હોસ્પિટલમાં થોડા દિવસો અગાઉ એક સગર્ભાનું મોત થયુ હતુ. આનંદ હોસ્પિટલના ડોક્ટર સી.કે.પટેલની બેદરકારીના કારણે મોત થયુ હોવાના આક્ષેપથી હડકંપ મચી ગયો છે. મૃતકના પરિવારજનો સાથે શહેરના નાગરિકો મોટી સંખ્યામાં શાંતિપુર્વક રેલી કાઢી ન્યાય આપવા માંગ કરી હતી.