લાંચ કેસમાં RTO અધિકારી અને ડ્રાઈવરને બે દિ'ના રિમાન્ડ

એસીબીના છટકામાં અધિકારી ફસાયા : મહિલા ઇન્ચાર્જ આરટીઓએ ૮૩,૨૦૦ની લાંચ માગી

પાલનપુર, તા. ૧૨ : પાલનપુરના ઇન્ચાર્જ મહિલા આરટીઓ અધિકારી અને તેમના ડ્રાઇવર રૂ.૮૩, ૨૦૦ના લાંચના છટકામાં સપડાઈ ગયા હતા. જેઓને આજે એ.સી.બી.એ કોર્ટમાં રજૂ કર્યા હતા. જ્યાં તેઓના ૨ દિવસના રિમાન્ડ મંજુર કરાયા હોવાના અહેવાલ સાંપડ્યા છે.

બનાસકાંઠાના મહિલા ઇન્ચાર્જ આર.ટી.ઓ અધિકારી દૃષ્ટિબેન જયંતી પટેલ (એ.આર.ટી.ઓ. વર્ગ - ૨, ચાર્જ- આર.ટી.ઓ.) રહે.શુકનગ્રીન સોસાયટી,પારપડા રોડ, પાલનપુરે વાહનોના રજીસ્ટ્રેશનનું કામ કરતા ફરિયાદી પાસે વેચાણ થયેલ વાહનોની ફી ઓનલાઇન ભરાતી હોવા છતાં ઇન્ચાર્જ આરટીઓ અધિકારી દ્વારા પાલનપુર જીલ્લાના ફોર્મનુ ઇન્સપેકશન તથા વેરીફાઇ કરાવવાના એક ફોર્મ દીઠ રૂ.૭૫ની તથા પાટણ જીલ્લાના એક ફોર્મ દીઠ રૂ.૧૦૦ લેખે ગત માસના વેચાણ થયેલા વાહનના કુલ પેટે રૂ.૮૩,૨૦૦ની માંગણી કરેલ હતી. જે રકમ તેમના ડ્રાઈવરને આપવાનું કહ્યુ હતુ. એ.સી.બી.ના છટકામાં આર.ટી. ઓ. કચેરીના કરાર આધારીત ડ્રાયવર પંકજકુમાર નાથુભાઇ ચૌધરી.રહે. લાલાવાડા, તા.પાલનપુરનાઓએ ઇન્ચાર્જ આરટીઓ અધિકારી દ્રષ્ટિબેન પટેલના કહ્યા મુજબ લાંચના નાણાં રૂ.૮૩,૨૦૦ સ્વિકારતા રંગે હાથ ઝડપાઈ ગયા હતા. દરમિયાન, આજે બંનેને એ.સી.બી.એ કોર્ટમાં રજૂ કરી વધુ તપાસ માટે ૨ દિવસના રિમાન્ડ માગ્યા હતા. કોર્ટે ૨ દિવસના રિમાન્ડ મંજૂર કર્યા હોવાના અહેવાલ સાંપડ્યા છે.