ઝાલોદ: ઘાવડીયા ચેક પોસ્ટ નજીક ટ્રક-બોલેરો વચ્ચે સર્જાયેલ ગમખ્વાર અકસ્માતમાં 3 મહિલા સહીત 4 મોતને ભેટી

ઝાલોદ: ઝાલોદ નગર નજીક ધાવડિયા ચેકપોસ્ટ નજીક રાત્રે ટ્રક અને બોલેરો વચ્ચે સર્જાયેલા માર્ગ અકસ્માતમાં રાજસ્થાનના ચાર વ્યક્તિના મોત થયા હતાં. આ ઉપરાંત સાત લોકો ઘાયલ થઇ ગયા હતાં. ચોસાલા સ્થિત સદગુરુ ફાઉન્ડેશનમાંથી ટ્રેનિંગ પતાવીને પરત જતી વેળા આ અકસ્માત સર્જાયો હતો. આ ઘટના અંગે પોલીસે ગુનો દાખલ કરવાની તજવીજ હાથ ધરી છે.

રાજસ્થાનના વિવિધ ગામના લોકો ચોસાલા ખાતે સદગુરુ ફાઉન્ડેશનમાં ટ્રેનિંગ માટે આવ્યા હતાં. તેઓ ટ્રેનિંગ પતાવીને જીજે-9-બીડી-121નંબરની બોલેરો જીપમાં પોતાના ઘરે પરત જઇ રહ્યા હતાં. ત્યારે રાતના દસેક વાગ્યાના અરસામાં ઝાલોદ નગર નજીક આવેલી ધાવડિયા ચેકપોસ્ટ પાસે રાજસ્થાન તરફથી પુરપાટ આવતી આરજે-27-એ-3797 નંબરની ટ્રકે બોલેરો જીપને અડફેટમાં લીધી હતી.