આણંદમાં ઝૂંપડપટ્ટીમાં દારૂ પીવા ગયેલ યુવાનને ત્રણ શખ્સોએ ઢોર માર મારતા હાલત ગંભીર
આણંદ:શહેરની મેલડી માતા ઝુંપડપટ્ટીમાં આજે બપોરના સુમારે દારૂ પીવા માટે ગયેલા એક યુવાનને ત્રણ શખ્સોએ ગેસની પાઈપથી ઢોર માર મારતાં યુવકને ગંભીર હાલતમાં આણંદની એક ખાનગી હોસ્પિટલમાં સારવાર માટે લઈ જવામાં આવ્યો છે. આ અંગે શહેર પોલીસે કાર્યવાહી હાથ ધરી છે.
પ્રાપ્ત વિગતો અનુસાર શહેરના પરીખભુવનમાં રહેતો અને પથિકાશ્રમ પાસે મરી-મસાલા વેચીને જીવન ગુજરાન ચલાવતો રમેશભાઈ મનજીભાઈ દાતણીયા બપોરના સુમારે મેલડી માતા ઝુંપડપટ્ટીમાં દેશી દારૂ પીવા માટે ગયો હતો. જ્યાં દારૂ વેચતા ઈરફાન, સીરાજ અને બોડીયો નામના શખ્સ સાથે તકરાર થતાં ત્રણેય જણા ગેસની પાઈપ લઈને તેના પર તુટી પડ્યા હતા અને માથામાં ફટકો મારીને તેમજ બરડાના ભાગે ઢોર માર મારતાં સોડ પડી જવા પામ્યા હતા. દરમ્યાન અન્ય લોકોએ વચ્ચે પડીને વધુ મારમાથી છોડાવ્યો હતો. ત્રણેય શખ્સો ત્યારબાદ જાનથી મારી નાંખવાની ધમકી આપીને ત્યાંથી જતા રહ્યા હતા. આ તરફ યુવકના પરિવારજનોને જાણ કરતાં જ તેઓ ઘટનાસ્થળે પહોંચી ગયા હતા અને ગંભીર રીતે ઘવાયેલા યુવકને તુરંત જ નજીકની હોસ્પિટલમાં સારવાર માટે લઈ જવામાં આવ્યો હતો. ઘટનાની જાણ શહેર પોલીસને કરવામાં આવતાં પોલીસે પણ આ અંગે ગુનો દાખલ કરવાની કાર્યવાહી હાથ ધરી છે.