વિદેશમાં રજીસ્ટ્રેશન ૧૧૧ ઇન્ટરનેશનલ બીઝનેસ સેન્ટર દ્વારા કૌભાંડ

'દુનિયા ઝુકતી હૈ, ઝુકાનેવાલા ચાહીએ' ૪ર ટકાનું વળતર આપવાની લાલચમાં હજારો રોકાણકારોના કરોડો રૂપીયા ડુબ્યાઃ સુરતમાં પ્રથમ ગુન્હો નોંધાયોઃ બીટ કનેકટના જેલમાં રહેલા આરોપી દિવ્યેશ દરજી વિ. વિરૂધ્ધ ફરીયાદઃ સીઆઇડી વડા આશિષ ભાટીયાના માર્ગદર્શનમાં તપાસનો ધમધમાટ

રાજકોટ, તા., ૧૧: દુનિયા ઝુકતી હૈ, ઝુકાનેવાલા ચાહીએ એ કહેવત ફરી એક વખત યથાર્થ સાબીત થવા સાથે બીટકોઇનની  બહેન જેવી બીટ કનેકટ કંપનીના નામે જેની સામે કરોડો રૂપીયાની છેતરપીંડી કૌભાંડના આરોપ છે તેવા હાલ જયુડીશ્યલ કસ્ટડીમાં રહેલા દિવ્યેશ દરજી સામે વધુ એક ફરીયાદ  સીઆઇડીમાં દાખલ થવા સાથે દેકાડો નામની કંપની બનાવી હજારો રોકાણકારો પાસેથી  કરોડો રૂપીયાનું દેશભરમાંથી રોકાણ મેળવી ૪ર ટકા સુધીનું વળતર આપવાની લાલચ આપી છેતરપીંડી થયાની ફરીયાદ નોંધાતા ગુજરાતમાં કૌભાંડોનો રાફડો ફાટયાનું ફલીત થયા વગર રહેતું નથી.

સીઆઇડી ક્રાઇમ સુરત ઝોનમાં નોંધાયેલી ફરીયાદ મુજબ ગિરીશકુમાર ધનજીભાઇ શેલડીયા (રહે. સુરત)એ આ કામના આરોપીઓએ પુર્વ આયોજીત ગુન્હાહીત કાવતરૂ રચી સન-ર૦૧૮માં દેકાડો નામની કંપની બનાવી તેનું વિદેશમાં રજીસ્ટ્રેશન કરાવી ગુજરાત સહિત ભારતભરમાં ૧૧૧ ઇન્ટરનેશનલ બીઝનેસ સેન્ટર શરૂ કરી પીપલોજ (સુરત) ખાત ઓફીસ રાખી હતી.

આ કંપનીએ રોકાણકારોને ઉંચુ કમીશન તથા આવા મુરઘા શોધી આપનારને વધારાના કમીશન આપવાના નામે વિદેશમાં તથા ભારતમાં જુદા-જુદા કાર્યક્રમો કરી અને મોટા વળતરની લાલચ આપી હજારો રોકાણકારો પાસેથી બીટ કોઇન જેવા દેકાડો કોઇન સ્વરૂપે નાણા એકઠા કરી લીધા હતા. બાદમાં વ્યાજ આપવાનું બંધ કરી દીધું હતું. 

ફરીયાદી ગીરીશ કુમાર ધનજીભાઇના જણાવ્યા મુજબ તેઓના ૪૮ લાખ રૂપીયા કંપની પાસેથી લેવાના થાય છે. બીજા લોકોના તો કરોડો રૂપીયા ડુબ્યાની શંકા છે. તપાસની  ગંભીરતા સમજી સમગ્ર મામલો રાજયના સીઆઇડી વડા આશિષ ભાટીયાએ ઝીણવટપુર્વક અભ્યાસ કરી આ તપાસ સુરતના સીઆઇડી ક્રાઇમના અધિકારી પી.જી.નરવાડેને સુપ્રત કરી છે. આવી છેતરપીંડીનો ભોગ બનેલાઓએ સુરત ખાતેની  નાનપુરા ખાતે આવેલી સીઆઇડી ક્રાઇમની બીજા માળે એ બ્લોકમાં આવેલી ઓફીસનો સંપર્ક કરવા અથવા પી.જી.નરવાડેનો ફોન નંબર ૯૮રપર ર૦૩૦૦ પર સંપર્ક કરવા લોકોને અપીલ કરી છે. (૪.૨)