મહેમદાવાદમાં વધુ એક મકાનમાંથી તસ્કરોએ 74 હજારની મતાની ચોરી કરી પલાયન થઇ જતા તપાસ શરૂ
મહેમદાવાદ: શહેરમાં છેલ્લાં કેટલાક દિવસોથી સક્રિય બનેલા તસ્કરો પોલીસને હાથતાળી આપી બિંદાસપણે ચોરીને અંજામ આપી રહ્યાં છે. બે દિવસ અગાઉ ત્રણ મકાનોમાંથી ચોરી થયા બાબતે હજી માંડ પોલીસે તપાસ આરંભી છે તેવામાં વધુ એક બંધ મકાનમાંથી સોનાના દાગીના તેમજ રોકડ મળી કુલ રૂપિયા ૭૪ હજારની ચોરી થયાની ફરિયાદ પોલીસ ચોપડે નોંધાઈ છે. જેને લઈ પોલીસતંત્રની કામગીરી પર સવાલ ઉઠવા પામ્યાં છે. સઘન પેટ્રોલીંગ વચ્ચે પણ દિનપ્રતિદિન વધતાં જતાં ચોરીના બનાવો નગરજનો માટે ચિંતાનો વિષય બન્યો છે. ત્યારે પોલીસતંત્ર દ્વારા યોગ્ય અને ઝડપી તપાસ કરી સક્રિય બનેલી તસ્કર ગેંગને ઝડપી પાડવામાં આવે તેવી નગરજનોની તીવ્ર માંગ ઉઠવા પામી છે. આ અંગે મળતી માહિતી મુજબ મહેમદાવાદમાં આવેલ શિવદીપ બંગ્લોઝ સોસાયટીમાં બી/૧૯ નંબરના મકાનમાં અજયકુમાર બળદેવભાઈ પટેલ પરિવાર સાથે રહે છે. ગત મંગળવારના રોજ અખાત્રીજનો પર્વ વતનમાં આવેલ ખેતરમાં મુહૂર્ત કરવાનું હોઈ ઘરના તમામ સભ્યો વહેલી સવારે ઘરના મુખ્ય દરવાજાને તાળુ મારી પોતાના વતન સુંઢા ગામે ગયાં હતાં. ત્યારબાદ મોડી સાંજે ઘરે પરત ફર્યાં હતાં.