બિલ્ડરને લૂંટવા આવેલા ૪માંથી બેને ઝડપી પડાયા
બિલ્ડરને લૂંટવા લૂંટારુઓએ ખતરનાક પ્લાન ઘડ્યો બોમ્બે માર્કેટમાં જઈ રહેલા બિલ્ડરને આંતરી ૪ બદમાશો પૈકી એક યુવકે દારૂડિયાનો ઢોંગ કરી ઝપાઝપી કરી હતી
સુરત,તા.૭ : સુરત શહેરમાં લૂંટારુઓ બેફામ બન્યા છે. સુરતનાં વરાછામાં જૂની બોમ્બે માર્કેટ પાસે કોન્ટ્રાક્ટર પાસેથી ચાર લૂંટારૂઓ મોબાઇલ ફોન અને રોકડની લૂંટ કરી રહ્યા હતાં. બરાબર આ જ સમયે પોલીસ પહોંચી જતાં બે લૂંટારૂ ઝડપાઇ ગયા હતા. જ્યારે બે ભાગવામાં સફળ રહ્યા હતા. મળતી માહિતી પ્રમાણે વરાછામાં જૂની બોમ્બે માર્કેટ ખાતે જઈ રહેલા બિલ્ડરને આંતરીને ચાર બદમાશો પૈકી એક યુવકે દારૂડિયાનો ઢોંગ કરી ઝપાઝપી કરી હતી. ત્યારબાદ બળજબરી કરી રોકડા રૂપિયા ૧,૫૦૦ અને મોબાઇલ લૂંટીને ટોળકી ભાગી જવાની ફિરાકમાં જ હતી. આ સમયે પોલીસ ત્યાં પહોંચી હતી જેથી બે લૂંટારૂ પકડાયા હતા. અડાજણમાં અયોધ્યાનગરી રોડ પર કેદારનાથ સોસાયટીમાં રહેતા મનિષ જયેશભાઇ ડોડિયા (૪૧) બિલ્ડર છે. ગત તા. ૬ના રોજ તેઓ વરાછા-જૂની બોમ્બે માર્કેટ પાસે કામાર્થે ગયા હતા. દરમિયાન માર્કેટના ગેટ નં-૧ પાસેથી પસાર થતી વેળા બે એક્ટિવા તેમના તરફ ધસી આવી હતી.
બંને એક્ટિવા પર સવાર ચાર યુવકો પૈકી એક યુવકે દારૂડિયા હોવાનો ઢોંગ કરી મનિષભાઈની બાઇક પર પડી ગયો હતો. મનિષભાઇએ ધક્કો મારવાનો પ્રયાસ કર્યો તો તેના સાગરિતોએ વચ્ચે પડી મનિષભાઇના ખિસ્સામાંથી રોકડા રૂપિયા ૧,૫૦૦ અને રૂપિયા ૫,૦૦૦નો મોબાઇલ કાઢી લીધો હતો. આ મુદ્દે તેઓ વચ્ચે ઝપાઝપી ચાલતી હતી ત્યારે પેટ્રોલિંગમાં નીકળેલી વરાછા પોલીસ મથકના એલઆર ચંદ્રદીપ ત્યાં પહોંચી ગયા હતા. પોલીસને જોઇ બે જણા ભાગી ગયા હતા, જ્યારે એક એક્ટિવાનેને મનિષભાઇએ પકડી લીધી હતી. ત્યારબાદ તે એક્ટિવા પર સવાર બંને યુવકોને પોલીસની મદદથી પકડી લેવાયા હતા. વરાછા પોલીસે પકડી પાડેલા બંને આરોપી સઇદ ઉર્ફે ચુહા નઝીરખાન પઠાણ (ઉ.વ. ૨૨, રહે. ખ્વાજાનગર, માનદરવાજા) અને મોહમંદ અબરાર ઉર્ફે અબુ ઇબ્રાહીમ શેખ (ઉ. વ. ૨૬, રહે. ખ્વાજાનગર, માનદરવાજા)ની ધરપકડ કરી હતી. બંને આરોપી રીઢા ગુનેગાર છે. અફઝલ ઉર્ફે નાવડી અને જલીલ શેખ મોબાઇલ અને રોકડ લૂંટી ભાગી ગયા હતા. જેની પોલીસે શોધખોળ હાથ ધરી છે.