વડોદરા કોર્પોરેશનમાં ૨૦૧૬માં ૧૪૩ કલાર્કની ભરતીમાં મોટી ગેરરીતિનો કોંગ્રેસનો આક્ષેપઃ જનરલ બોર્ડમાં મુદ્દો ઉછાવ્યો
વડોદરા: એલઆરડીની પરીક્ષાનું પેપર લીક થયા બાદ સરકારી ભરતીઓમાં થઈ રહેલા આક્ષેપો અટકવાનું નામ નથી લઈ રહ્યા, ત્યારે હવે વડોદરા મ્યુનિસિપલ કોર્પોરેશનમાં ક્લાર્કની ભરતીમાં મોટો કાંડ થયાનો આક્ષેપ થયો છે. 2016માં વડોદરા મ્યુનિ.માં ક્લાર્કની 143 જગ્યાઓ માટે ભરતી આવી હતી. જોકે, નવાઈની વાત એ છે કે, આ ભરતીમાં પસંદગી પામેલામાં વડોદરાનું કોઈ નથી.
વીએમસીએ 2016માં એક લેખિત પરીક્ષા યોજીને પાંચ વર્ષના કોન્ટ્રાક્ટ પર જુનિયર ક્લાર્કની ભરતી કરી હતી. પાંચ વર્ષ પૂરા થયા બાદ તમામને કાયમી નિમણૂંક આપવાની હતી. જોકે, 2016માં આવેલી ભરતી પહેલા અને પછી કોઈ વિવાદ નહોતો થયો. પરંતુ કોર્પોરેશનની જનરલ બોર્ડ મિટિંગમાં કોંગ્રેસે આ મુદ્દો ઉછાળતા કહ્યું હતું કે, 146 જુનિયર ક્લાર્કમાંથી વડોદરાનો એકેય વ્યક્તિ ન હોય તે કઈ રીતે બની શકે? આ આક્ષેપ સાંભળી મેયર ડૉ. જિગીશા શેઠ પણ આશ્ચર્યમાં મૂકાઈ ગયાં હતાં.
આ ભરતીમાં કોઈ ગેરરીતિ થઈ છે કે તેમ તે ચકાસવા માટે વીએમસીએ તપાસ શરુ કરી દીધી છે. લેખિત પરીક્ષા આપવા બેઠેલા ઉમેદવારો અને તેમાં પાસ થનારા લોકોની માહિતી પણ એકઠી કરાઈ રહી છે. મેયરના જણાવ્યા અનુસાર, આ ભરતીમાં ઉતિર્ણ થયેલા 40 લોકોએ નોકરી શરુ ન કરતા તેમના બદલે વેઈટિંગ લિસ્ટમાંથી 40 લોકોની પસંદગી કરાઈ હતી.
સત્તાધિકારીઓના જણાવ્યા અનુસાર, ભરતીની સમગ્ર પ્રક્રિયા ગુજરાત ટેક્નોલોજીકલ યુનિ. દ્વારા હાથ ધરાઈ હતી. જોકે, હાલ કોર્પોરેશન સાવધાની સાથે આ બાબતમાં આગળ વધી રહ્યું છે, કારણકે તે વખતે ભરતી થયેલા મોટાભાગના લોકો બે વર્ષથી નોકરી કરી રહ્યા છે. જ્યારે, બે વર્ષમાં કેટલાક લોકોએ નોકરી છોડી પણ દીધી છે.
આ પરીક્ષામાં ઉતિર્ણ થયેલા તમામ ઉમેદવારો સૌરાષ્ટ્ર યુનિ.ના વિદ્યાર્થીઓ હતા. કોંગ્રેસે આ ભરતીમાં ગેરરીતિ થઈ હોવાનો સીધો આક્ષેપ કરી તેના માટે ભાજપને જવાબદાર ઠેરવ્યો છે.