રાજસ્થાની પ્રેમી સાથે ભાગી ગયેલ યુવતી દિલ્હીથી ઝડપાઈ

યુવતીએ ફિલ્મી સ્ટોરીને ટક્કર મારે એવો પ્લાન ઘડ્યો : યુવતીએ પોતે પકડાય નહીં તે માટે ૧૨ સિમકાર્ડ ખરીદ્યા, એકવાર વાત કર્યા બાદ સિમકાર્ડને તોડીને ફેંકી દેતા હતા

સુરત, તા.૫ : ફિલ્મી સ્ટોરીને પણ ટક્કર મારે તેવો પ્લાન બનાવીને પોતાના રાજસ્થાની પ્રેમી સાથે ભાગી ગયેલી સુરતની યુવતીને પોલીસે પ્રેમી સાથે દિલ્હીથી ઝડપી લીધી છે. પોલીસને આ યુવતીએ જણાવ્યું હતું કે તેણે પોતે પકડાય નહીં તે માટે ૧૨ સિમકાર્ડ ખરીદ્યા હતા. એકવાર વાત કર્યા બાદ તેઓ સિમકાર્ડને તોડીને ફેંકી દેતા હતા. તે અને તેનો પ્રેમી ઘરેથી ભાગ્યા ત્યારથી કોઈ સ્થળે બાર કલાકથી વધુ સમય રોકાતા પણ નહોતા. આ સિવાય પણ યુવતીએ બીજા પણ કેટલાક ચોંકાવનારા ખુલાસા કર્યા હતા.

સીએના ક્લાસ કરતી અને સુરતના વરાછા વિસ્તારમાં રહેતી રિદ્ધિ (નામ બદલ્યું છે)ને મૂળ રાજસ્થાનના આકાશ ખટીક સાથે પ્રેમ થઈ ગયો હતો. પ્રાપ્ત વિગતો અનુસાર, બંનેની મુલાકાત ઈન્સ્ટાગ્રામ મારફતે થઈ હતી. જોકે, પરિવારજનોએ આ સંબંધોને મંજૂર રાખવાનો ઈનકાર કરી દેતા રિદ્ધિએ આકાશ સાથે ભાગી જવાનો પ્લાન બનાવ્યો હતો. પોલીસથી કઈ રીતે બચી શકાય તે માટે તેણે યૂટ્યૂબ પર વિડીયો પણ જોયા હતા, અને ઘરેથી નીકળતા પહેલા પોતાનો ફોન ફોર્મેટ મારીને ત્યાં જ છોડી દીધો હતો.

૨૯ જુલાઈના રોજ રિદ્ધિ સાંજે બુક લેવા જાઉં છું તેમ કહીને ઘરેથી નીકળી હતી. જોકે, ઘણીવાર સુધી તે પરત ના આવતા તેના પિતાએ તેને ફોન કર્યો હતો. પરંતુ ફોન ઘરમાંથી જ મળી આવ્યો હતો અને તે પણ ફોર્મેટ મારેલો હતો. આ દરમિયાન રિદ્ધિના પિતાના ફોન પર એક અજાણ્યા નંબર પરથી કોલ આવ્યો હતો, અને ફોન કરનારાએ દીકરી પાછી જોઈતી હોય તો ૧૦ લાખ તૈયાર રાખજો તેવી વાત કરી હતી. જોકે, ત્યારબાદ આ ફોન બંધ થઈ ગયો હતો. આ મામલે વરાછા પોલીસ સ્ટેશનમાં ફરિયાદ નોંધાતા રિદ્ધિની શોધખોળ શરુ થઈ હતી. પોલીસને પ્રાથમિક તપાસમાં જાણવા મળ્યું હતું કે તેના એક રાજસ્થાની યુવક સાથે પ્રેમસંબંધો હતા. પોલીસે સીસીટીવી ચેક કરતાં રિદ્ધિ તેના પ્રેમી સાથે બાઈક પર જતી પણ જોવા મળતા તે પ્રેમી સાથે જ ભાગી ગઈ હોવાનું કન્ફર્મ થઈ ગયું હતું.

આ દરમિયાન પોલીસને બાતમી મળી હતી કે રિદ્ધિ અને તેનો પ્રેમી ઈન્દોર બાજુ ગયા છે. પોલીસે આ ઈનપુટના આધાર પર એક ટીમને ઈન્દોર રવાના કરી હતી. જોકે, ટીમ ત્યાં પહોંચે તે પહેલા જ રિદ્ધિ અને તેનો પ્રેમી ત્યાંથી રફુચક્કર થઈ ગયા હતા. ત્યારબાદ તેમનું લોકેશન અલગ-અલગ સ્થળોએ મળ્યું હતું અને આખરે દિલ્હી આગ્રા-મથુરા હાઈવે પર આગ્રા ટોલનાકા પાસેથી પોલીસે તેમને ટ્રેક કરીને પકડી લીધા હતા. છેલ્લા પાંચ-છ દિવસમાં રિદ્ધિ અને આકાશ રાજસ્થાન, એમપી અને યુપી તેમજ દિલ્હીમાં ફર્યા હતા. તેઓ સતત લાંબા રુટની બસોમાં ફરતા હતા અને થોડો સમય હોટેલમાં રોકાતા હતા. તેઓ એકનો એક નંબર યુઝ ના કરતા હોવાથી પોલીસને પણ તેમને ટ્રેસ કરવામાં ભારે પરસેવો પાડવો પડ્યો હતો.

આખરે જ્યારે બંનેને પકડવામાં આવ્યા ત્યારે રિદ્ધિના પ્રેમીએ જણાવ્યું હતું કે તેણે રિદ્ધિના કહેવાથી જ તેના પિતાને ફોન કરી ૧૦ લાખની ખંડણી માગી હતી જેથી તે પોતાની સાથે ભાગી ગઈ છે તેવી કોઈને શંકા ના જાય. બીજી તરફ, રિદ્ધિએ પણ પોતાના પ્લાન અંગે વટાણા વેરતા કહ્યું હતું કે તેણે ઘરેથી ભાગી જવા માટે ૫૦ હજાર રુપિયા બચાવીને રાખ્યા હતા. આકાશ દસ સુધી જ ભણેલો હોવા ઉપરાંત રાજસ્થાનનો હોવાથી તેના માતાપિતા પ્રેમસંબંધના વિરોધમાં હોવાથી તે આકાશ સાથે રાજસ્થાનમાં જ ક્યાંક સ્થાયી થઈ નોકરી કરવાનું વિચારી રહી હતી. પોલીસથી બચવા અને આકાશ સાથે રહેવા રિદ્ધિએ પ્લાન તો મજબૂત બનાવ્યો હતો પરંતુ પોલીસે તેને આખરે પકડી લીધી છે. તેના પ્રેમી વિરુદ્ધ વરાછા પોલીસ સ્ટેશનમાં અપહરણ અને ખંડણી માગવાનો ગુનો પણ નોંધાયેલો છે.