અમદાવાદમા દારૂના નશામાં શંકાશીલ પતિએ પત્નીને તેના પિયરમાં જઈ ઢોરમાર મારતા પોલીસ ફરિયાદ દાખલ
અમદાવાદ: આ અંગે પ્રાપ્ત માહિતી અનુસાર ભાનુમતીબહેન ખટીકે બે વર્ષ અગાઉ દીપક ખટીક સાથે બે વર્ષ અગાઉ પ્રેમલગ્ન કર્યા હતા. લગ્નના ૬ મહિના બાદ જ બંને વચ્ચે જ ટકરાવ શરૃ થઇ ગયા હતા અને ભાનુમતી બહેન ગોમતીપુર ખાતે તેમના માતા-પિતાના ઘરે રહેવા માટે આવી ગયા હતા. બંનેને લગ્ન જીવનમાંથી દોઢ વર્ષનો પુત્ર છે.
દરમિયાન દીપક ખટીક દારૃ પીને રવિવારે રાત્રે પત્નીના પિયરે પહોંચી ગયો હતો. જ્યાં તેણે ખોટા શક બદલ પત્ની સાથે બોલાચાલી શરૃ કરી હતી. આ પછી અપશબ્દો બોલવા લાગ્યો હતો. અપશબ્દો નહીં બોલવા માટે ભાનુમતીબહેન તથા તેમના માતા-પિતાએ સમજાવ્યા તો તે વધુ ઉશ્કેરાયા હતા. તેમણે આ પછી પત્નીના પિયરના ઘરમાં લોખંડના સળિયાથી તોડફોડ કરી એલઇડી ટીવી, તીજોરીનો કાચ તોડી નાખ્યો હતો. રોકવાની કોશિષ કરી રહેલી પત્નીને પણ માર માર્યો હતો. આજુબાજુના લોકો એકત્ર થઇ જતાં તેણે જતી વખતે એવી ધમકી આપી કે, 'તું આ વખતે બચી ગઇ છો હવે તને જાનથી મારી નાખીશ.' આ મામલે દીપક ખટીક સામે વધુ ગુનો નોંધી ગોમતીપુર પોલીસે વધુ તપાસ હાથ ધરી છે.