Gujarati News

સુરત: કાપોદ્રાની શક્તિવિજય સોસાયટીના સુંદરમ એપાર્ટમેન્ટમાં ચાલતા જુગારધામ પર દરોડા પાડી 5 મહિલા સહિત 8ને જુગાર રમતા ઝડપી પાડી રૂ. 1.26 લાખનો મુદ્દામાલ ઝડપી પાડયો હતો. પોલીસ ત્રાટકે નહીં તે માટે જુગારધામ ચલાવનારે એપાર્ટમેન્ટના સીસીટીવી રૂમમાં એક યુવાનને વોચ માટે બેસાડયો હતો.

કાપોદ્રા પોલીસે બાતમીના આધારે શક્તિ વિજય સોસાયટીના સુંદરમ એપાર્ટમેન્ટના ફ્લેટ નં. 302માં દરોડા પાડયા હતા. પોલીસે ફ્લેટમાં રહેતા અને ડ્રાઇવીંગ કામ કરતા મેહુલભાઇ ઉર્ફે કાળુ પિયુષભાઇ બારડ (ઉ.વ.29) ઉપરાંત શૈલેષ ધનજી માયાણી (ઉ.વ.42 રહે. રાજ શૈલી એપાર્ટમેન્ટ, ઉત્રાણ), રસિક મનસુખ જીવાણી (ઉ.વ. 58 રહે. સિધ્ધી વિનાયક એપાર્ટમેન્ટ, સરથાણા જકાતનાકા), ભાવના ઉર્ફે ભરતી ચંદુભાઇ ઠેસીયા (ઉ.વ. 40 રહે. લક્ષ્મીનગર સોસાયટી, માતાવાડી, વરાછા), ગંગા ઉર્ફે ગીતા ભાવેશ ભીલ (ઉ.વ. 34 રહે. અયોધ્યા સોસાયટી, પુણા), જીણુબેન ઉર્ફે ભાવના રાણાભાઇ મકવાણા (ઉ.વ. 50 રહે. ડાહ્યાપાર્ક સોસાયટી, વરાછા), ભાવના અશોક સરવૈયા (ઉ.વ. 42 રહે. ભગુનગર સોસાયટી, માતાવાડી, વરાછા), માલુબેન ઉર્ફે મીના મધુભાઇ આહીર (ઉ.વ. 40 રહે. ભગીરથ સોસાયટી, વરાછા) ને જુગાર રમતા રંગેહાથ ઝડપી પાડયા હતા.