Gujarati News

લાખણી તાલુકાના ચિત્રોડા ગામ પાસે કાર અને ટ્રક વચ્ચે સર્જાયેલા અકસ્માતમાં ડીસાના વહેપારીના પુત્રનું ઘટનાસ્થળે મોત થવા પામ્યું હતું. જ્યારે કાતરવા ગામ પાસે થયેલા અન્ય એક અકસ્માતમાં થરાદના પોલીસ કોન્સ્ટેબલ સહિત ચાર વ્યક્તિઓ ઇજાગ્રસ્ત થતાં પંથકમાં અરેરાટી મચી જવા પામી હતી રાત્રીના સમયે લાખણી થી ડીસા હાઇવે ઉપર એક જ કલાકના સમયમાં અલગ-અલગ જગ્યાએ અલગ-અલગ બે અકસ્માતો સર્જાવા પામ્યા હતા.

 લાખણી તાલુકાના ચિત્રોડા ગામ પાસે થરાદથી અલ્ટો ગાડી નં. GJ-8-D- 9938 ને ડીસા તરફથી આવી રહેલ ટ્રક નં. GJ-08-AU- 0504 ના ચાલકે ગફલત ભરી રીતે પુરઝડપે હંકારી ટક્કર મારતા અલ્ટો ગાડીના ચાલક ડીસાના વેપારી પુત્ર નિકુંજકુમાર દિનેશચંદ્ર વ્યાસનું ઘટના સ્થળે જ કરૂણ મોત થવા પામ્યું હતું. જ્યારે તેના એક કલાકના સમયમાં જ લાખણી તાલુકાના કાતરવા ગામ પાસે બે કાર વચ્ચે અકસ્માત સર્જાવા પામ્યો હતો. જેમાં થરાદ પોલીસ સ્ટેશનમાં ફરજ બજાવતા કાંતિભાઇ જુડાલ (પોલીસ કોન્સ્ટેબલ) , નિકુંજભાઇ પરમાર (બંને રહે. થરાદ), સૌરભ રસિકભાઇ ગામીત (રહે. ચાંદખેડા) તથા નીતાબેન પ્રવિણભાઇ સોલંકી (રહે. સાબરમતી -અમદાવાદ) ને ઇજાઓ થવા પામી હતી. એક જ દિવસે બે અકસ્માતના સમાચારથી પંથકમાં અરેરાટી મચી જવા પામી હતી