Gujarati News

અમદાવાદઃ ટૂંક સમયમાં ગુજરાત રાજ્યમાં નેશનલ હેરિટેજ મેરિટાઇમ હેરિટેજ પ્રોજેક્ટની શરૂઆત થવા જઈ રહી છે. કચ્છ નજીક આવેલા લોથલ બંદરનું થોડા સમયમાં નવીનીકરણ શરૂ થશે. આ પ્રોજેક્ટ અંગે અગાઉ સરકારે જાહેરાત કરી હતી. લોથલ પુરાતન શહેરના વિકાસનો પ્રથમ તહક્કો શરૂ થશે. હડપ્પા સંસ્કૃતિ યુગની એ સાઇટ જ્યાં એક સમયે મોટા જહાજો રીપેર થવા માટે આવતા હતા. હાલમાં આ જગ્યા સૌથી જુના ડોકયાર્ડ તરીકે ઓળખાય છે. હડપ્પા સંસ્કૃતિના અવશેષો પણ અહીંથી મળી આવ્યા હતા.

સપ્ટેમ્બર મહિનાની શરૂઆતમાં મુંબઇમાં આ પ્રોજેક્ટ અંગેની એક મિટિંગ થતા વર્કશોપનું આયોજન કરવામાં આવ્યું હતું. આ 200 કરોડના પ્રોજેક્ટને થોડા સમયમાં શરૂ કરવામાં આવશે. ખાસ કરીને ક્નેક્ટિવિટીને કારણે આ પ્રોજેક્ટમાં વિલંબ થયો છે. કેન્દ્રીય મંત્રાલયના સાગરમાલા પ્રોજેક્ટથી સમગ્ર પ્રોજેક્ટને ફંડ પૂરું પાડવામાં આવશે. સાગરમાલા પ્રોજેક્ટ દ્વારા ગુજરાત મેરિટાઇમ બોર્ડ આ સાઇટનો વિકાસ કરશે. જેમાં સમગ્ર ટીમ ગુજરાત મેરિટાઇમ બોર્ડની હશે.

આ પ્રોજેક્ટ પાછળનો પીએમ મોદીનો હેતુ ભારતના પ્રારંભિક દરિયાકિનારાના અને દરિયાઈ ઇતિહાસની સિદ્ધીઓને પ્રદર્શિત કરવાનો છે. આ ઉપરાંત રાજ્યના અતિ જૂનવાણી વારસાને અદ્યતન ઢબે સાચવવાનો છે. આ સમગ્ર પ્રોજેક્ટની ડીઝાઇન નક્કી થઇ ચૂકી છે જેમાં હડપ્પાની પ્રાચિન કલાકૃતિને સ્થાન આપવામાં આવશે. સમગ્ર થીમમાં પ્રાચિન કલા મુખ્ય થીમ રહેશે. સમગ્ર પ્રોજેક્ટ માટે પ્રોજેક્ટ ડાયરેક્ટરની પોસ્ટ નિમણૂંક કરવા જાહેરાત કરી દેવામાં આવી છે.

સાગરમાલા પ્રોજેક્ટના ડાયરેક્ટર ડી. કે. રાયએ આ વિષય પણ મૌન સેવી લીધું છે પરંતુ, સુત્રોમાંથી મળી માહિતી અનુસાર મેરિટાઇમ ગ્રૂપ આ અંગે વિચારણા કરીને પ્રોજેક્ટ શરૂ કરશે. પ્રાચિન સમયની દરિયાઇ પ્રવૃતિઓને ધ્યાને લઇને લોથલ હડપ્પન સંસ્કૃતિને અંકિત કરતી એક મહત્ત્વની સાઇટ છે. 37×22 મીટરના એરિયામાં સમગ્ર ડોકયાર્ડ આવેલું છે. 3700 બીસી પૂર્વે શહેરોની બાંધણી, વ્યવસ્થા અને ડ્રેનેજ સિસ્ટમનું એક સૌથી શ્રેષ્ઠ ઉદાહરણ એટલે લોથલ બંદર.