Gujarati News

સુરત:વરાછાના લંબે હનુમાન રોડ પર રહેતા દંપતીએ ગઈ કાલે સાંજના સમયે ઘરમાં વારાફરતી ઝેરી દવા ગટગટાવી આપઘાત કરવાની કોશિશ કરતા ચકચાર મચી ગઈ હતી. બંનેને સ્મીમેર હોસ્પિટલમાં ખસેડાયા છે. પત્ની મોબાઇલ પર કોઇ સાથે વાત કરતી હોવાની શંકામાં થયેલા ઝઘડા બાદ પતિ પત્નીએ આ પગલું ભરી લીધું હતું.

સ્મીમેર હોસ્પિટલથી મળતી માહિતી મુજબ વરાછા રોડ લંબેહનુમાન રોડ  રહેતા ૨૬ વર્ષીય રીનાબેન અને ૨૭ વર્ષીય રત્નકલાકાર પતિ રૂપેશભાઈ (બંનેના નામ બદલ્યા છે) એ કાલે સાંજે પોતાના ઘરમાં વારાફરતી ઝેરી દવા પી લેતા બંનેને સ્મીમેરમાં દાખલ કરાયા છે.  તેમના પરિવારજનોએ જણાવ્યું હતું કે દંપતીને બે સંતાન છે. પત્ની રીના અવારનવાર મોબાઇલ ફોન પર કોઇકની સાથે વાત કરતી હતી. કેટલીકવાર રાતે પણ આ રીતે ફોન પર વાત કરતી હોવાની પતિને શંકા હતી.